"Facebook""-ийн дараа орох нөхөрлөлийн цахим сайтуудаас хамгийн олон гишүүнтэй, хурдацтай тэлж буй нь "Twitter" билээ. Дэлхийн олон зуун хотын мянга мянган твиттерчин залуус онлайн нөхөрлөлөө баталгаажуулж, нийгмийнхээ сайн сайхны төлөө нэгдэн “Twestival” цугларалт зохион байгуулдаг уламжлалтай. Тэд”жиргээчдийн”наадмын үеэр олон арга хэмжээ зохион байгуулж, хандив цуглуулан сайн үйлсэд зориулдаг. Анх Лондон хотноо зорилго нэгт твиттерчин залуусын эхлүүлсэн энэхүү хөдөлгөөн өдгөө 41 орны 160 хотод жил бүр нэгэн зэрэг болдог томоохон баяр болжээ.

Твиттерчид ядуу буурай орны иргэдэд цуглуулсан мөнгөө хандивладаг. 2009 онд "Twestival""-д оролцогчид нийт 250 мянган фунттай тэнцэх мөнгийг "Charity Water" хэмээх олон улсын байгууллагад хандивласнаар Африк ийн олон тосгоныг цэвэр усны гачигдлаас аварч байсан юм.

Дэлхийн Залуусын сайн үйлсийн төлөөх хөдөлгөөнөөс Улаанбаатарын залуус ч хоцрохыг хүссэнгүй. Дэлхийн хөгжилтэй хөл нийлүүлэн алхагч Монголын твиттерчин залуус нийгмийн сайн сайхны төлөө ихийг хийж бүтээх хүсэл эрмэлзлээр нэгдэж ирэх сарын 24-нд "UBTwestival" наадам зохион байгуулахаар болжээ. Улаанбаатарын твиттерчид дуу хоолойгоо нэгтгэн дэлхийн сая сая твиттерчдийн эгнээнд нэгдэн хандивын аян өрнүүлэх бөгөөд хуримтлуулсан мөнгийг Монгол Улсад үйл ажиллагаа явуулдаг олон улсын хүүхдийн байгууллагад хандивлах юм байна.