Даваа гаригт Швейцарийн нэгэн банкер улс орны болон томоохон компаниудын нууцыг задлаж буй “WikiLeaks” вэб сайтад банкны талаар нууц материал өгсөн байна. Рудольф Элмер гэгч банкер Лондон хотод болсон хэвлэлийн бага хурлын үеэр “WikiLeaks”-ын үүсгэн байгуулагч Жулиан Ассанжид банкны материал бүхий хоёр диск өгчээ. Харин үүнийг богино хугацаанд нягталж шалгаад, хэдэн долоо хоногийн дараа олон нийтэд танилцуулах болно гэж Ассанж хэлж байна.

Элмер энэ материалд хэдэн хүний мэдээлэл байгаа, тэд хэн болох гэдэг талаар хэлээгүй ч нийт 2000 орчим үйлчлүүлэгчийн материал байгаа гэсэн таамаглал байна.

“Банкер хүний хувьд ямар нэг зүйл болохгүй байгааг мэдэж байгаа тохиолдолд үүний эсрэг тэмцэх эрхтэй гэж бодож байна. Миний мэддэг зүйлс, банкны систем нийгэмд ямар хохирол учруулж байгаа гэдгийг хүмүүс мэдэх ёстой” гэж Элмер даваа гаригт хэлжээ. Түүнийг банкны нууцлалын талаарх журам зөрчсөн гэх хэрэг үүсгэн, Швейцарь улс лхагва гаригт шүүх хурал хийх юм байна.