Олимпийн наадмын өмнөх жил учир 2011 он спортын салбарынхны хувьд олимпийн эрх авах чухал он жил байх учиртай. Монголын топ дөрвөн спортын нэг гэгддэг буудлага спортынхон дэлхийн аварга шалгаруулах тэмцээнээс гадна олон улсын чанартай цуврал тэмцээнээс олимпийн эрхийн оноо цуглуулах юм. Дэлхийн аварга шалгаруулах тэмцээнд амжилттай оролцож, шагналын тавцанд гарч чадвал Лондонг зорих эрхтэй болох буудлагынхны дэлхийн аварга шалгаруулах тэмцээн энэ оны есдүгээр сард Сербийн нийслэл Бельград хотноо болно. Харин үүний өмнө мэргэн буудчыг нэлээд хэдэн тэмцээн хүлээж байгаа ба олимпийн эрхийн оноо олгох анхны тэмцээн нь ирэх гуравдугаар сард болох ажээ. Австралийн Сидней хотноо гуравдугаар сарын 21-нд эхлэх тус тэмцээнээс медаль хүртсэн тохиолдолд олимпийн эрхийн оноо олгодог байсан ч энэ жилээс эхлэн зөвхөн финалд шалгарсан, өөрөөр хэлбэл, алт эсвэл мөнгөн медаль хүртсэн тамирчинд эрхийн оноо олгох талаар яригдаж байгаа гэнэ. Тиймээс ч Хөдөлмөрийн баатар О.Гүндэгмаа, ОУХМ Ц.Мөнхзул, залуучуудын дэлхийн аварга Ц.Хонгорзул тэргүүтэй мэргэн буучид олимпийн наадамд аль болох өргөн бүрэлдэхүүнтэй оролцож, медалийн хур буулгах зорилго өвөртлөн шинэ он гармагц бэлтгэлээ эрчимтэй хийж эхэлжээ.