Сүхбаатар аймгийн “Жаахан шарга “театрын уран бүтээлчид театр урлагийн дээд шагнал болох “Гэгээн муза” наадамд  анх удаа оролцох гэж байна. Найруулагч Л.Гомбосүрэнгийн найруулга “Жаахан шарга” хөгжимт жүжиг, зохиолч Мар. Баджиевын зохиол “Сэтгэлд харвасан  туяа” драмын жүжгүүдээр мэргэжил нэгтнүүдтэйгээ өрсөлдөх  гэнэ.

Драмын мэргэжилтнүүд төвөөс  зохион байгуулдаг  урлагийн дээд шагнал гардуулах “Гэгээн муза”-2010 ёслол ирэх гуравдугаар сард уламжлал ёсоор болно. Наадамд анх удаа аймгийн Жаахан шарга театрын уран бүтээлчид хоёр  төрлөөр оролцох юм.

Хөгжимт жүжиг, драмын жүжиг гэсэн хоёр төрлөөр урлагийн музануудыг шалгаруулдаг наадамд оролцох бүтээлүүд энэ сарын 27 гэхэд шүүгчдийн гар дээр очсон байх ёстой бөгөөд хэрвээ шалгарсан тохиолдолд манай  уран бүтээлчид гуравдугаар сард нийслэлд очиж тоглох юм.

Оролцож байгаа хоёр бүтээлийн хувьд хоёулаа өвөрмөц найруулгаар дэглэсэн гэдгийг “Жаахан шарга” театрын ерөнхий найруулагч Л.Гомбосүрэн онцолж байна.