3,383.86
Халдварт өвчин судлалын үндэсний төвөөс томуугийн А хүрээний H1N1 вирусээр 74 хүн өвчилсөн хэмээн мэдээлсэн. Эдгээрийн багагүй хувийг жирэмсэн эхчүүд, хүүхдүүд эзэлж байгаа аж. Уг вирус манай улсад өнгөрсөн онд цар тахлын хэмжээнд тархаж 30 гаруй хүн амь насаа алдсан. Тиймээс Эрүүл мэндийн яамны Нийгмийн эрүүл мэндийн бодлогын хэрэгжилтийг зохицуулах газрын дарга С.Төгсдэлгэрээс ямар арга хэмжээ авч буйг нь тодрууллаа. -А хүрээний H1N1 вирусийн халдварын лабораториор батлагдсан тохиолдлын тоо 74-т хүрчихлээ. Салбарын яамнаас ямар арга хэмжээ авч байна вэ?
-Уг вирус нь өнгөрсөн онд манай улсад цар тахлын хэмжээнд тархаж шинээр бүртгэгдсэн. Харин энэ онд бол улирлын томуугийн нэг хэлбэр хэмээн үзэж байгаа. Эрүүл мэндийн яамнаас иргэдийг дархлаажуулах, вакцинжуулах ажлыг хийж байна. Түүнчлэн аймаг, нийслэлийн хэмжээнд эмч нарт А хүрээний H1N1 вирусийн халдвар нэмэгдсэн үед авах арга хэмжээний талаар сургалт зохион байгуулсан.
-Гэхдээ өнгөрсөн онд уг вирус тархсаны улмаас цөөнгүй хүн амь насаа алдсан шүү дээ?
-А хүрээний H1N1 вирус нь бусад улирлын томуутай адил шинж тэмдгээр илэрдэг. Харин хүндрэхээрээ эрсдэл ихтэй. Өнгөрсөн жил уг вирус тархах үеэр Монгол Улсын хэмжээнд эмнэлгүүдийг шаардлагатай тоног төхөөрөмжөөр хангасан. Амбулаторийн шинжилгээний хандалтын 15-аас дээш хувийг томуугийнх эзэлж байвал эмнэлгүүд уртасгасан цагаар ажилладаг юм. Одоогийн байдлаар ийм хэмжээнд хүрээгүй.
Зохиогчийн эрх:
"Улс төрийн тойм" сонин
