Apple” компанийн бүтээл iPad таблет компьютерийн зах зээлд тун удахгүй хоёр дахь “ихэр”-ээ төрүүлж, хувьсгал хийхээр зэхэж буй. Худалдаанд гарсан даруйдаа таван сая хувь зарагдсан Стив Жобсын “шидэт хавтан” ирэх сард шинэхэн, ширүүхэн өрсөлдөгчтэйгээ нүүр тулахад бэлдэх хэрэгтэй болжээ. Түүний өрсөлдөгч нь “Blackberry” компанийн “Playbook”. iPad-ыг бодвол харьцангуй авсаархан бөгөөд утасгүй холбоогоор мэдээлэл дамжуулахад гол анхаарлаа хандуулсан нь хэрэглэгчдийн эрэлтэд бүрэн нийцэж байгаа аж. Зөөврийн уг компьютерийг 399 ам.доллараар худалдахаар зэхэж буй нь ч хэрэглэгчдийн хэтэвчинд ээлтэй байх юм. “Blackberry Playbook”-ийг энэ оны эхний улиралд АНУ-д худалдаалж эхлэх бөгөөд дараагийн улирлаас бусад улсын зах зээлд гаргахаар төлөвлөжээ.