сэртхийлгэсэн хэргүүд гарсан. Тухайлбал, Баянзүрх дүүрэгт өнгөрсөн
сарын 30-нд таксины жолоочийг буудан амь насыг нь хөнөөсөн хэрэг
гарчсан. Үүнээс гурав хоногийн өмнө буюу өнгөрсөн сарын 27-28-нд
шилжих шөнө Баян-Өлгий аймгийн Шуудан холбооны газрын удирдах ажилтнууд
улс төрийн холбогдолтой маргааны улмаас галт зэвсэг хэрэглэсэн тухай
мэдээлэл цацагдсан юм. Баян-Өлгий аймгийнхан Засаг даргаа суудлаас нь
унагаах оролдлогыг хэд хэдэн удаа хийснээс үзэхэд тус аймагт эл үзэгдэл
сэдэрсэн байж болзошгүй юм.
Хэрэг явдлын талаар Баян-Өлгий аймгийн Засаг дарга С.Хавалаас тодруулсан юм.
-Өнгөрсөн сарын 27-28-нд шилжих шөнө танай аймгийн удирдах албан
тушаалтнууд нэг нэгнийхээ эсрэг галт зэвсэг хэрэглэсэн гэсэн. Яг юу
болсон юм бэ?
-Тийм асуудал гарсан эсэхийг мэдэхгүй. Гэхдээ манай аймгийн удирдлагын
дунд улстөрийн элдэв маргаан байхгүй гэдгийг баттай хэлж чадна. Өнгөрсөн
сарын 29-нд аймгийн ИТХ 35 гишүүний ирцтэйгээр эв найртай хуралдсан.
Хурлаар буудалцаан болсон гэсэн асуудал сөхөгдөөгүй. Харин аймгийн
төсвийг баталж, газар зохион байгуулалт, аудитын тайлангийн үр дүнг
хэлэлцсэн.
-Хувь хүмүүсийн дунд маргаан болсон юм болов уу. Танд энэ талаар ямар ч мэдээлэл ирээгүй гэж үү?
-Хувь хүмүүсийн дунд тийм маргаан гарсан байхыг үгүйсгэхгүй. Энэ талаар Цагдаагийн хэлтсийн даргаас мэдээлэл авч болно.
Тэрбээр буу шийдэмдээ хүрсэн маргаан гарсныг үгүйсгэсэн ч галт зэвсэг хэрэглэсэн тохиолдлыг үгүйсгээгүй юм.
Харин тус аймгийн Цагдаагийн хэлтсийн дарга н.Бакийт “Аймгийн прокурорын
газрын дарга энэ талаарх мэдээллийг өгөх ёстой” хэмээсэн юм.
Баян-Өлгий аймгийн прокурорын газрын дарга Х.Жанибек буудалцаан болсон талаар ийнхүү хариулсан юм.
-Шинэ оны өмнөхөн танай аймагт буудалцаан болсны улмаас хүн гэмтсэн
байж магадгүй гэсэн мэдээлэл тархсан. Үүнд ямар тайлбар өгөх вэ?
-Мэдээллийг шалгаж дууссаны дараа тодорхой хариулт өгөх боломжтой. Одоогоор өөр мэдээлэл өгөх боломж алга.
Тэрбээр дээрх хариултыг өгөөд утсаа тасалсан юм. Баян-Өлгий аймагт
буудалцаан болсныг удирдлагууд нь үгүйсгээгүй. Харин энэхүү буудалцаанд
аймгийн удирдлагууд оролцсон гэсэн мэдээллийг няцааж байлаа.
Тиймээс энэ талаар ЦЕГ-ын Хэвлэл, мэдээллийн төвийн байцаагч Н.Төгсбаяраас тодруулав.
-Баян-Өлгий аймагт буудалцаан гарсан нь тодорхой болсон ч удирдлагууд нь нууцлаад байх юм. Энэ талаарх мэдээлэл ЦЕГ-т ирсэн үү?
-Мэдээлэл ирсэн. Баян-Өлгий аймгийн төвд өнгөрсөн сарын 27-28-нд шилжих
шөнийн үүрийн таван цагт буун дуу гарсан юм билээ. Иргэн Б гэгч
эхнэртэйгээ муудалцсаны улмаас эхнэрийнхээ байсан айлын хаалгыг эвдэх
гэж оролдож, агаарт хий буудсан тохиолдол гарсан. Уг хэргийг Эрүүгийн
хуулийн 181.3-т зааснаар эрүү үүсгэн шалгаж байна.
-Аймгийн удирдлагууд энэ хэрэгт холбоотой байж болзошгүй гэсэн мэдээлэл тархсан байсан?
-Ердөө л гэр бүлийн маргаанаас үүдсэн хэрэг л дээ.
-Ямар маркийн буугаар буудсан юм бол. Иргэн Б галт зэвсэг хэрэглэх зөвшөөрөлтэй хүн үү?
-“Вепер” маркийн буугаар буудсан. Хэргийг шалгаж байгаа учир тухайн иргэний талаар мэдээлэл өгөх боломжгүй.
ЦЕГ-ын Хэвлэл, мэдээллийн төвийн байцаагч дээрх хариултыг өгсөн юм.
Ямартай ч шинэ оны өмнө хоёр ч удаа буун дуу гарч нэг удаагийнх нь
тохиолдол эрдэнэт хүний амийг авч одсон. Цаашид ийм хэрэг давтагдахгүй
гэх баталгаа алга гэдгийг дээрх явдлууд нотоллоо.
Зохиогчийн эрх:
"Улс төрийн тойм" сонин