Ням гаригт Чили улсад 7,1 баллын хүчтэй газар хөдлөлт болсон байна. АНУ-ын Геологийн эрдэм шинжилгээний газрын хэлснээр 17:20 цагийн орчим болсон газар хөдлөлт Сантиаго хотоос 595 километрийн зайд мэдрэгдсэн байна. Харин газар хөдлөлтийн цөм нь газар доор 10 милийн гүнд байсан аж. Одоогоор үүнээс болж хохирол учирсан тухай мэдээлэл байхгүй байна. Иргэдэд газар хөдлөлт хүчтэй мэдрэгдсэн ч хохирол учраагүй гэж CNN мэдээлжээ. Чичирхийллээс болж зарим газар телефон утас болон цахилгааны шугам сүлжээ тасарсан аж.

Газар хөдлөлтийн дараа 5,0 баллын хүчтэй чичирхийлэл мэдрэгдсэн байна.

Чили улсад өнгөрсөн оны хоёрдугаар сард 8,8 баллын хүчтэй газар хөдлөлт болж, олон зуун хүн амиа алдсан юм.