Хойд Америкийн Үндэсний хөлбөмбөгийн лигийн шинэ улирлын тоглолтууд өндөрлөхөд ердөө ганцхан долоо хоног үлдээд байна. 16 дахь долоо хоногт цөөнгүй баг плей-оффт өрсөлдөх боломжоо нээжээ. Монголын цагаар өнгөрөгч баасан гаригийн өглөө болсон тоглолтод “Питсбург Стийлерс” багийнхан “Каролина Пантэрс”-ыг 27:3 харьцаатай хожсоноор плей-оффын байраа хадгалж, цаашлаад эхний шатныг өрсөлдөөнийг ч өнжих болзлоо бараг л аваад байна. Харин ням гаригт хамгийн сонирхолтой тулаан “Грийн бей Пакерс”, “Нью-Йорк Жайантс” багуудын хооронд өрнөж, “Пакерс”-ийн куартэрбак Аарон Родригесийн гайхалтай тоглолтын ачаар 47:17 харьцаатай ялалт байгуулж, плей-оффт өрсөлдөх эрхээ авлаа. Аарон Родригес чухал тоглолтод 404 ярдын оновчтой дамжуулалт хийснээс гадна дөрвөн удаа точдауны дамжуулалт хийсэн нь багаа плей-оффт шалгаруулахад хангалттай үзүүлэлт байсан юм. Мөн “Балтимор Рейвенс” Кливлэндийн талбайд зочлон эзэн баг “Броунс”-ыг 20:10 харьцаатай хожсоноор плей-оффт өрсөлдөх эрхээ авчээ. “Рейвенс”-ийн куартэрбак Жой Флакко 19 довтлогооныхоо 12-ыг амжилттай болгож, хоёр точдауны дамжуулалт өгч, багийнхаа хожилд нөлөөлсөн байна. Эй Эф Си бүсийн өмнөд дивизид харьяалагддаг “Жэксонвилл Ягуарс” талбайдаа “Вашингтон Рэдскинс” багийг хүлээн авч тоглосон тулаан энэ долоо хоногийн цорын ганц нэмэлт цагт ялагчаа тодруулсан тоглолт болсон байна. Харамсалтай нь, цагаан хуудсаар плей-оффт орох эрхийн төлөө өрсөлдөж байгаа “Ягуарс” плей-оффт өрсөлдөх эрхгүй болсон нийслэлийн хөлбөмбөгийн багийг дийлсэнгүй, 20:17 харьцаатай хожигдол хүлээжээ. Тэдний дараагийн учраа Эй Эф си бүсийн сулхан баг “Хьюстон Тэксанс” байх болно. Плей-оффт орох тун ойрхон гэж нэрлэгдэж байсан “Канзас Сити Чийфс” энэ долоо хоногт “Теннесси Тайтанс” багийг хүлээн авч, 34:14 харьцаатай хожиж, плей-оффт өрсөлдөх эрхээ авсан бол тэдний адил байдалтай байсан  “Нью-Йорк Жэтс” хожил байгуулснаар плей-оффт багтжээ. Харин “Филаделфия Ийглс” энэ улиралд хамгийн тааруу амжилт гаргаж байгаа багийн нэг, тэд маргааш өглөө “Миннесота Вайкингс” багтай улирлын 16 дахь тоглолтоо хийх гэж байгаа ч дивизийн аваргын төлөө өрсөлдөж байсан “Жайнтс” ялагдал хүлээснээр тэд плей-оффт орох болзлоо хангажээ. Гэхдээ “Вайкингс”-ын эсрэг ялалт хэрэгтэй юм.

Сүүлийн долоо хоногийн тоглолт шинэ оны гурав дахь өдөр болох бөгөөд плей-оффын үлдсэн гурван байрын эзэд тодрох юм.