Монгол Улс байгалийн баял­гаараа дэлхийд тэргүүлэх гүр­нүүдийн нэг болох боломжтойг дэл­хий нийт хүлээн зөвшөөрч эхэллээ. Монголчууд үүний эхлэлийг улиран одож буй 2010 онд ажил хэрэг болгож чадсанаараа бахархаж суугаа нь лавтай. Энэ онд Монголын уул уур­хайн компаниуд олон улсын хөрөнгө оруулагчдад эх орноо сурталчилж, монголчууд  хөрөнгийн зах зээлд өрсөлдөх чадвартай гэдгийг баталж чадсан юм. Одоогоор “Петроматад”, “Хүн­нү коал”, “ММС”, “Харанга ресурс” зэрэг ком­пани олон улсын Хөрөнгийн биржүүдэд хувьцаагаа борлуулж байгаа юм. Эдгээр компанийн хувь­цааны ханш тогтмол өсч, олон улсын хө­рөн­гө оруулагчдын хөрөнгийн урсгал Монголыг чиглэж байна. Иймээс ч энэхүү бүтээн бай­гуулалтын эрин зууныг гад­ны хөрөнгө оруулагч, сайн түнш­лэлгүйгээр төсөөлөхийн аргагүйг монгол хүн бүхэнд ойлгуулж чад­сан юм. Тэдний ачаар гадаадын хөрөнгө оруулагчид ч монголчуудад итгэх итгэлтэй болж, дэлхийн хөрөнгөтнүүд Монголыг сонирхож, хоорондоо “булаалдаж” эхэллээ. Тий­мээс ч төр засгийн тэргүүнүүд уул уурхайн салбарт анхаарлаа хандуулж, өндөр ач холбогдол өгсний үндсэн дээр стратегийн томоохон ордуудыг ашиглах гэрээг үзэглэн дэлхийн жишигт нийцэх хөрөнгийн зах зээлийг эх орондоо нутагшуулах эх­лэлийг энэ онд тавив. Монгол хүн дэлхийн хөрөнгийн зах зээлийн үйл ажиллагаанд эх орныхоо Хөрөнгийн биржээр дамжуулан оролцох болол­цоог бүрдүүлэхийн тулд хөрөнгийн зах зээлийн менежментийг боловс­ронгуй болгохоор ажиллаж байна. Хөрөнгийн биржийн үйл ажиллагааг дэлхийн жишигт нийцүүлэх ажлыг дээрх компаниуд нээж өглөө. Мөн  дэлхийн жишигт нийцсэн хөрөнгө оруулалтын санхүү­жилтийг шийдэх Хөгжлийн банкны асуудлыг ч энэ л компаниуд идэвхжүүлсэн юм. Төр засаг, хувийн хэвшлийнхэн хамтарч ажиллах эхлэл гагцхүү уул уурхайн салбараас салаалж, олон улсын хөрөнгө оруу­лагчдын анхаарлыг татахын тулд давах ёстой шалгуур үзүүлэлтүүдийг хангахын төлөө хүчээ нэгтгэж ажил­лаж эхэллээ. Үүний тод илрэл нь олон улсын хөрөнгө оруулагчдыг урьж, уулзалт зөвлөлгөөн хийх, Мон­голын компаниудад зөвлөгөө өгөх арга хэмжээнүүдийг өнгөрч буй онд шил дараалан зохион бай­гуулсан явдал байлаа. Мөн дэл­хийн томоохон Хөрөнгийн бир­жийн мэргэжилтнүүдтэй уул уур­хайн компанийн захирлуудыг харилцан санал солилцуулж, олон улсын Хө­рөнгийн биржүүдтэй танил­цуулсан нь Монголын компаниудын “нүдийг тайлах” анхны алхам болов. Олон улсын Хөрөнгийн биржид анхдагчид болсон компаниудын нээсэн энэ зам уул уурхайн компаниудад урам өгө­хөөс гадна олон улсад хүлээн зөвшөөрөгдсөн, бүртгэлтэй брокер, дилерийн компаниудыг эх орондоо хөгжүүлэхэд ихээхэн түлхэц болж байна. Эдгээр компанийн хувьцааг авах хүсэлтэй монгол иргэдэд мэдээлэл өгөх, хувьцаа худалдаж авахад нь туслахаар “Нортерн сек” болон “Монголын олон улсын хөрөнгийн корпораци” гэсэн олон улсад хүлээн зөвшөөрөгдсөн брокер, дилерийн компани хөгжиж байгаа юм.

Р.САРАНГОО

Зохиогчийн эрх:
 "Улс төрийн тойм" сонин