Улс төр, урлаг, бизнесийн салбарын шилдгүүд оролцдог “Маскарад шоу” энэ сарын 30-нд 20.00 цагт “UB Palace”-ын Royal танхимд улаан хивсний ёслолоор эхлэх нь ээ. Энэ удаагийн Маскарат шоунд роп попын амьд домог Харанга, Хурд, Камертон  хамтлагуудаас гадна хэсэг хугацаанд уран бүтээлээ түр завсарлаад байсан Чоно хамтлаг тайзнаа эргэн гарч ирэх бол этно рок урсгалаар тоглодог Алтан ураг, Мотив, Дижитал хамтлагийн дуучин Эрка, поп дива Наран болон бүжиг дэглээч Д.Баярбаатар, гавьяат жүжигчин, дуучин С.Жавхлан гээд олны танил эрхмүүд хүрэлцэн ирж ая дуугаа өргөн барих юм байна. Мөн хошин шогийн Шинэ үе, Захиалгат инээд хамтлагууд үүрийн дөрвөн цаг хүртэл үргэлжлэх “Маскарад шоу”-г хөтлөхөөс гадна өөрсдийн тоглолтоороо үзэгчдэд бэлэг барих нь ээ. Элитүүдэд зориулсан энэхүү цэнгүүн “Үдшийн Хатан хаан”, “Үдшийн Ханхүү”-г тодруулахаас гадна ивээн тэтгэгчийн шагнал, шарсан тоорой, сарнай цэцгийн дуудлага худалдаа гээд олон олон сюрприз таныг хүлээж байна. Дашрамд сонирхуулахад энэхүү “Маскарад шоу”-ны тасалбар 70 ам. доллар ажээ.