3,411.42
Английн Премьер лигийн 19 дүгээр тойргийн сүүлийн тоглолт Лондонгийн “Эмират” цэнгэлдэхэд болж, талбайн эзэн “Их буучид” “Цэнхрүүд”-ийг 3:1 харьцаатай бут ниргэжээ. Хоёр багийн хувьд тэргүүлэгч “Манчестер Юнайтед”-аас оноо дутуу, тоглолт илүү учраас энэ тоглолтод чухал ач холбогдол өгсөн нь тодорхой. 2008 оны арваннэгдүгээр сараас хойш талбайдаа “Челси”-г хожоогүй “Арсенал” гурван тоглолт дараалан гоол оруулаагүй байсан юм. Энэ урт хугацааны дараа хар цувралыг төгсгөл болгох эхлэлийг тавьсан тоглогчоор Александр Сонг тодорч, 44 дэх минутад эхний гоолыг хийсэн. Урдаа ганцхан довтлогч гаргасан Арсень Венгер Уолкотт, Фабрегас, Насри гэсэн гоолын төлөө төрсөн тоглогчдоор хагас хамгаалалтаа бүрдүүлжээ. Харин хоёр долоо хоногийн өмнө “Тоттенхэм”-тэй тэнцсэн бүрэлдэхүүндээ Карло Анчелотти ганц нэг өөрчлөлт хийсэн байлаа. Лампард тоглолтын эхнээс талбайд гарсан бол түүнтэй Дрогба хамтарч, харин Анелька хуучин багийнхаа эсрэг тоглоогүй. Гэсэн ч энэ өдөр Премьер лигийн шилдэг хослол “Цэнхрүүд”-ийн фенүүдийг баярлуулж чадаагүй юм. Харин хоёрдугаар үе эхлээд таван минут өнгөрч байхад “Арсенал” жинхэнэ “Их буучид”-ын төлөө зүрх сэтгэл нь цохилдог фанатууддаа хоёр ч гоолоор бэлэг барьсан. Ван Персигийн эхлүүлсэн довтолгоог багийн ахлагч Фабрегас гүйцээж, тооны харьцааг 2:0 болгосон бол үүнээс хоёр минутын дараа наймдугаар сараас хойш гоолдоогүй байсан Тео Уолкотт Фабрегасын дамжуулалтаар Чехийн баруун доод буланд маш хүчтэй намаар цохин хаалганы торыг хөдөлгөсөн байна. Тэрбээр ийнхүү тав дахь гоолоо хийж, багийнхаа мэргэн буучдын хоёрдугаар байранд орж ирсэн байна. Мэдээж найман гоолтой Насри багийнхаа нөхдийг тэргүүлж байгаа билээ.Талбайн төвийн хамгаалалтын үүргийг гүйцэтгэж байсан Иванович гоолын зөрүүг багасгаж, тооны харьцааг 3:1 болгон ойртуулсан нь “Челси”-г нойрноос нь сэрээсэн үйл явдал болсон. Ямартай ч “Арсенал”-ын эсрэг тоглолт болгонд гоол хийдэг Дрогбагийн энэ амжилт зогссон ч тэрбээр Ивановичид мөргөж гоол оруулах боломжийг нь бүрдүүлж өгсөн юм. Үүний дараагаар мөн л энэ хоёр тоглогчийн оролцоотой нэгэн аюултай довтолгоо өрнөсөн ч хамгаалагч Клиши тэдний хичээл зүтгэлийг үгүй хийсэн юм.
Английн Премьер лигийн шилдэг хоёр багийн тулаанд ийнхүү “Арсенал” ялалт байгуулж, дараагийн өрсөлдөгч “МанЮ”-тай хүснэгтийн тэргүүлэгчийн өрсөлдөөнд хүчтэй орж ирлээ.
Премьер лигийн явц:
М | Клуб | Тоглолт | Хожил | Тэнцээ | Хожигдол | Гоол | Оноо | |
1 | МАНЧЕСТЕР ЮНАЙТЕД | 17 | 10 | 7 | 0 | 38-16 | 37 | |
2 | АРСЕНАЛ | 18 | 11 | 2 | 5 | 37-20 | 35 | |
3 | МАНЧЕСТЕР СИТИ | 19 | 10 | 5 | 4 | 28-16 | 35 | |
4 | ЧЕЛСИ | 18 | 9 | 4 | 5 | 32-15 | 31 | |
5 | ТОТТЕНХЭМ | 18 | 8 | 6 | 4 | 27-23 | 30 | |
6 | БОЛТОН | 19 | 7 | 8 | 4 | 32-25 | 29 | |
7 | САНДЕРЛЕНД | 19 | 6 | 9 | 4 | 21-20 | 27 | |
8 | СТОК СИТИ | 18 | 7 | 3 | 8 | 23-22 | 24 | |
9 | НЬЮКАСЛ | 18 | 6 | 4 | 8 | 28-29 | 22 | |
10 | ЛИВЕРПУЛЬ | 17 | 6 | 4 | 7 | 21-22 | 22 | |
11 | БЛЭКПУЛ | 16 | 6 | 4 | 6 | 24-29 | 22 | |
12 | БЛЭКБЕРН | 19 | 6 | 4 | 9 | 23-30 | 22 | |
13 | ВЕСТ БРОМВИЧ | 18 | 6 | 4 | 8 | 24-31 | 22 | |
14 | ЭВЕРТОН | 18 | 4 | 9 | 5 | 20-21 | 21 | |
15 | АСТОН ВИЛЛА | 18 | 5 | 5 | 8 | 20-30 | 20 | |
16 | УИГАН | 18 | 4 | 7 | 7 | 15-29 | 19 | |
17 | БИРМИНГЕМ | 17 | 3 | 9 | 5 | 17-20 | 18 | |
18 | ФУЛХЭМ | 18 | 2 | 10 | 6 | 17-23 | 16 | |
19 | ВЕСТ ХЭМ | 19 | 3 | 7 | 9 | 19-32 | 16 | |
20 | ВУЛВЕРХЭМПТОН | 18 | 4 | 3 | 11 | 19-32 | 15 |
Премьер лигийн 20 дугаар тойргийн тоглолтууд энэ өдрүүдэд мөн үргэлжилнэ. Мягмар гаригийн 22.30 минутаас “Боловсрол суваг” ТВ “Тоттенхэм”, “Ньюкасл” клубуудын тоглолтыг шууд дамжуулан үзүүлэх болно.
Score Studio
