Шинэ он дөнгөж гармагц Үндсэн хуулийн Цэцийн гишүүнд нэр дэвшүүлэх өрсөлдөөн эхлэх гэж байна. Учир нь Цэцийн дөрвөн ч гишүүний бүрэн эрх он гармагц дуусгавар болно. Мөн Үндсэн хуулийн Цэцийн даргын суудал эзгүй байгаа юм. Өмнөх дарга Ж.Баямбадоржийн бүрэн эрх дуусгавар болж Хүний эрхийн үндэсний комиссын дарга болоод байгаа билээ. Цэцийн гишүүн Ж.Болдбаатар, Д. Наранчимэг, Н.Жанцан, Ж.Амарсанаа нарын бүрэн эрх 2011 оны нэгдүгээр сард дуусгавар болох учир орны хүмүүсийн нэрийг он гармагц дэвшүүлэхээр болжээ. Ийнхүү Цэцэд орон гарсан таван суудлын эздийг тодруулах их ажил өрнөх гэж байна. Үндсэн хуулийн Цэцийн гишүүдийг Монгол Улсын Ерөнхийлөгч, УИХ, Улсын дээд шүүхээс санал болгодог. Энэ удаад Ерөнхийлөгчийн санал болгодог гурав, Дээд шүүхийн мэдлийн нэг суудал сулрах нь.

Төрийн ордонд дуулдаж буйгаар бол УИХ дахь МАН-ын бүлгийнхэн Улсын ерөнхий прокурор асан М.Алтанхуягийг Цэцийн гишүүнд нэр дэвшүүлэхийн төлөө байгаа аж. Мөн түүнийг Үндсэн хуулийн Цэцийн даргад өрсөлдүүлэхээр санал нэгдээд байгаа юм байна. Гэвч УИХ дахь АН-ын бүлгийнхэн Ерөнхий прокурорын албанаас сайн дураараа хэл амтай буусан түүнийг Цэцийн даргад өрсөлдүүлэх боломжгүй хэмээн үзжээ. Нийгэм ч тийм уур амьсгалтай байгаа. УИХ-ын дарга нийгмийнхээ уур амьсгалыг дагасан байр суурь илэрхийлээд буй. Тэгэхээр М.Алтанхуяг Цэцийн гишүүн болсон ч дарга болохгүй байх магадлал илүү болжээ.

Бүрэн эрх нь дуусгавар болж байгаа гишүүдээс Н.Жанцан, Ж.Амарсанаа нарыг улираан нэр дэвшүүлэх боломжтой хэмээн үзэж байгаа юм байна. Тэднээс Ж.Амарсанааг Цэцийн дарга болгох магадлал нэлээд өндөр буй талаар Төрийн ордонд дуулдаж байна. Мөн хуульч, академич С.Нарангэрэлийн нэрийг дэвшүүлж магадгүй байгаа юм байна.