Английн Премьер лигийн 19 дүгээр тойргийн тоглолтууд хуваарь ёсоор ням гаригт боллоо. Хэд хэдэн шалтгааны улмаас зарим багууд хоёр тоглолт дутуу хийгээд байна.

Цасанд дарагдсан Английн хөлбөмбөгийн ногоон талбайд ням гаригт нийт долоон тоглолт өрнөсөн. Эхний тоглолтыг “Фулхэм” лигийн сүүл  мушгигч “Уэстхэм”-ийг талбайдаа хүлээн авч, тоглосон ч Марк Хьюзын шавь нар Зул сарын баяраа хэт их тэмдэглэсэн үү, яасан, 3:1 харьцаатай хожигдсон. “Алхнууд”-ын гол довтлогчдын гэмтэл бэртэл нь илааршиж байгаа бололтой, Карлтон Коул хоёр, Пикуйонне нэг гоол оруулжээ.

Лигийн шилдэг дасгалжуулагчдын нэг “Том Сэм” хочтой Аллардайсыг ажлаас нь халж, олны хэл амны бай болоод байгаа “Блэкбурн” Ивүүд Парк цэнгэлдэхдээ “Стоук Сити”-г мөн л барсангүй. Улирлыг дуустал багаа удирдах болсон нөөцийн дасгалжуулагч Стив Кин энэ удаад юу ч хийж чадсангүй. Харин Тони Пулисын багаас Хьют, Вилсон нар гоолдсон байна.

Харин “Болтон Вандерерс”, “Манчестер Юнайтед” багууд хоёул талбайдаа учраагаа 2:0 харьцаатай буулган авсан байна. Энэ улирлын нээлт болоод байгаа “Уэст Бромвич Албион” “Болтон”-гийн Рийбок цэнгэлдэхэд гавьсангүй. Харин Болгарын шилдэг хөлбөмбөгчийн шагналыг долоон удаа хүртээд байгаа Димитар Бербатов “Мөрөөдлийн театр”-таа дубль хийснээр “Сандерланд”-ыг хожжээ. Ингэснээр тэд 17 тоглолтоос 37 оноотой болж, лигийг итгэл төгс тэргүүлж явна.

Сэйнт Жэймс Паркт олны төсөөлж байснаас огт өөр тоглолт болж, “Манчестер Сити” “Ньюкастл”-ыг 3:1-ээр буулгаж авсан байна. Тоглолтын эхний минутад Гарет Бэрри гоол хийж, зочид тэргүүлж эхэлсэн бөгөөд багаа орхих шийдвэр гаргаад байгаа Тевез 5 болон 81 дэх минутад гоолдсон байна. Харин “Алаг шаазгайнууд”-ын нэр төрийн гоолыг Энди Карролл хийсэн аж. Ингэснээр “Сити” тэргүүлэгчээс хоёр тоглолт илүү хийсэн ч хоёр оноо дутуу, хоёрдугаар байрт бичигдэж эхэлжээ.

Түүнчлэн өчигдрийн тоглолтод “Вулверхэмптон” “Уиган”-ыг талбайдаа бараагүй бол “Астон Вилла” “Тоттенхэм”-д мөн л талбайдаа хожигдсон. Энэ зуны хамгийн зөв наймаа гэгдээд байгаа Рафаэль ван дэр Ваарт эсрэг багийн хаалгыг хоёронтоо мялаасан байна. Харин өнөөдөр Лондонгийн хамгийн алдартай дерби болно. Тодруулбал, “Эмиратс” цэнгэлдэхэд “Арсенал”, “Челси”-гийн ширүүн тулаан болох юм.

Премьер лигийн 19 дүгээр тойргийн дүн:

“Фулхэм” 1:3 “Уэстхэм”
“Блэкбурн” 0:2 “Стоук Сити”
“Болтон” 2:0 “Уэст Бром”
“МанЮ” 2:0 “Сандерлэнд”
“Ньюкастл” 1:3 “Ман Сити”
“Вулвес” 1:2 “Уиган”
“Астон Вилла” 1:2 “Тоттенхэм”

Score Studio