Манучехр Моттаки эх орондоо биш Сенегалд явахдаа Гадаад хэргийн сайд байхаа болжээ. Эх сурвалж: АР
Ираны ерөнхийлөгч Махмуд Ахмадинежад тус орны Гадаад хэргийн сайд Манучехра Моттакийг огцрууллаа. Одоо Исламын бүгд найрамдах улсыг удирдаж байгаа хуучинсаг үзэлтнүүдийн дунд зөрчилдөөн тодорхой байгааг шууд хэлж болно. Ираны доод ангиас гаралтай залуучууд тус улсын шашин төрийн тэргүүн аятолла Али Хаменеин талынханд шууд эсэргүүцлээ үзүүлэв. Аятоллаг ахмад насныхан, туршлагтай хувьсчгалчид болох клерикалууд (шашны улс төр ба соёлын нөлөөг ихэсгэхийг эрмэлзэгчид) нь дэмждэг. Энэ сарын 13-ны өдөр нутаг нэгтнүүддээ Моттакийг албан тушаалаас нь чөлөөлснөө Ахмадинежад гэнэтхэн дуулгав. Тодорхой шалтгааныг тэрээр хэлсэнгүй. Гэхдээ учир явдлыг нэгэн жижиг нөхцөл улаан цайм тодруулж өглөө. Ахмадинежад өөрийн шийдвэрээ зарлаж байхад Моттаки албан ёсны айлчлалаар Сенегалд явж байжээ.
Клерикалийн эсрэг огцруулалт
Огцруулж байгаагаа хэлсэн Ахмадинежадын үг нэлээд өдөөсөн шинжтэй байв. “Ингээд би түүнд (Моттаки) таван жил Гадаад яамыг толгойлж байсных нь төлөө талархах гэсэн юм. Түүнийг бурхан ивээх болтугай” гэж тэр хэлжээ. Моттакийн оронд Ираны цөмийн хөтөлбөрийн гол хэлэлцээрч Али Акбар Салехи томилогдсон байна. Ахмадинежад таарах хүнийг нь олтол тэрээр ГХЯ-ны сайдын үүргийг гүйцэтгэж байх юм.
Хаменеи ба Ахмадинежад хоёрын сөргөлдөөний талаар өнгөрсөн наймдугаар сард нийтэд мэдээлэгдэж эхэлсэн юм. Тэр үед Ираны дээд удирдагч өмнө хийж байгаагүй алхамаа хийн Ахмадинежад нарын гол улстөрчдөд хандан засгийн эрхийн төлөөх тэмцлээ зогсоохыг шууд мэдэгдэн тийм сөргөлдөөн дэглэмийг сулруулдаг хэмээн сануулж байлаа.
“Засаглалын доторх сөргөлдөөнийг ил гаргаж болох олон нийтийн мэдэгдэл хийхгүй байхыг би албан ёсны хүмүүст ноцтойгоор сануулж байна.” хэмээн аятолла төв телевизээрээ мэдэгдсэн билээ. “Үзэл санааныхаа ялгааг эдгэрэшгүй шарх болгон хувиргах нь том алдаа” гэж тэр онцолсон байв. “Улс орны эрх баригч хүрээний эв нэгдэл ба нэгдмэл байдлыг хадгалах нь шашины үүрэг мөн. Хагаралыг нэн ялангуяа дээд хүрээний төвшинд гаргах эрмэлзэл бол исламын сургаалын эсрэг үйлдэл” гэж Хаменеи мэдэгдсэн ба түүнийг нь Дээд удирдагч ба Ираны дэглэмийн шашины лидер өөрийн эрх мэдэлд халдаж буйг мэдэрсэн хэрэг хэмээн шинжээчид дүгнэж байв.
Хаменеи ч мөн Ахмадинежад ч хамаардаг Ираны эрх баригч консерваторуудын лагерьт хагаралын шугам гарч ирсэний шинж тэмдэг гэж Оросын стратегийн үнэлгээний институтын шинжээч мэргэжилтэн Сергей Демиденко хэлж байна. ”Сүүлийн үед залуу, эрч хүчтэй төрийн зүтгэлтнүүд, тухайлбал, Ахмадинежад эрх мэдлийн төлөөх эрмэлзлэлээ улам гаргах болсон байна. Ираны 1978 оны лалын хувьсгалыг хийсэн Хаменеи ба бусад аятолла нар хамаардаг хөгшин үеийнхэнд тэр нь таалагдахгүй байна. Жишээлбэл, ерөнхийлөгчийн сонгуулийн үеэр төвийг сахисан нөлөө бүхий аятолла Рафсанжанийн эсрэг түрэмгий үйлдэл хийж эхэлснийх нь төлөө тэд Ахмадинежадыг шүүмжилж байсан билээ. Учир нь тэд клерикал засаглалынхаа төлөө аюулыг мэдэрсэн юм” хэмээн Демиденко тайлбарлав.
Сайд хэрэггүй
Оросын Ойрхи Дорнодын инститтутын ерөнхийлөгч Евгений Сатановский: “Ахмадинежад Иранд гадаад бодлогыг хариуцсан тусгай төлөөлөгчдийн институтыг бий болгосон юм. Тэд гадаад бодлогын зургаан чиглэлээр ажиллаж байна. Тэр хүмүүс бүгд л Ахмадинежадынхан. Жишээлбэл, Ираны ерөнхийлөгчийн тамгын газрын дарга Эсфандьяр Рахим Машаи Ойрхи Дорнодын тусгай элч болсон байна” гэж хэлэв.
Энэ шийдвэр нь дээд удирдагчийн дэмжлэг аваагүй ба Хаменеи төрийн бүтцийгөөрчлөхгүй байх үүрэг өгчээ. “Ахмадинежад албан ёсоор үүнийг зөвшөөрсөн боловч тэр үүргийг нь үл тоосон байв. Учир тэр зургаан элч нөгөө л үүргээ хүлээсэн байлаа. Ганцхан тэдний нэрийг өөрчлөн ерөнхийлөгчийн зөвлөх болгосон юм” хэмээн тэрээр нэмэн хэлэв. Ийм нөхцөлд Гадаад хэргийн сайд ерөнхийлөгчид хэрэггүй болсон учир түүнийг огцруулж байгаа гэж Сатановский өгүүлэв.
Дэглэмийн улс төрийн хагарал нь өнөөгийн эрх баригчдийг унагаж магадгүй. Гэхдээ энэ нь өнөө маргаашийн хэрэг биш. Эрх баригчдийн бодлогоос болон Ираны эдийн засаг хүнд байдалд байна. Хөрөнгө мөнгөний ихэнхийг цөмийн болон сансрын салбарт хийж олон нийтийн амьдралыг сайжруулахад хүрэлцээгүй болгосон юм. Хэрэв консерваторууд энэ бодлогоо өөрчлөхгүй бол 10 жилийн дотор энэ дэглэм сүйрч магадгүй болж байна.