Өвөрхангай аймаг үүсч хөгжсөний 80 жилийн ойг угтан аймгийн ИТХ-аас 2010 оныг “Орчноо тохижуулах жил” болгон зарласан билээ. Мөн 80 бүтээлч ажлын жагсаалтанд  “аймаг, сумын төв, байгууллага, аж ахуйн нэгж, айл өрх бүрийн гадаад өнгө үзэмжийг сайжруулж, өндөр бүтээлийн аян зохион байгуулна” хэмээн заасан.  Энэ хүрээнд албан газрууд байгууллагынхаа өнгө үзэмжийг сайжруулах, орчин тойрноо засварлах ажлыг гүйцэтгэж байгаа юм.

Аймгийн шүүх нь “Орчноо тохижуулах жил”-ийн хүрээнд хоёр давхар барилгаа гурав болгон өргөтгөлөө. Үүнд Шүүхийн Ерөнхий Зөвлөлийн тендерт санал оруулснаар улсын төсвийн хөрөнгө оруулалтаас  289 сая төгрөгийн  санхүүжүүлэлт өгчээ. Мөн орон нутгийн төсвийн хөрөнгө оруулалтаар нэг давхарын өрөөнүүдийн тохижилтын ажилд 15 сая төгрөг зарцуулсан бол гаднах хайсандаа 100 ширхэг хоёр настай шар хуайсны суулгац тарьж, үүнд 150 мянган төгрөг зарцуулсан гэнэ.