АНУ-ын хэрэглэгчийн итгэл нэмэгдэж, гадаад худалдааны зөрүү багассан болон БНХАУ банкны нөөцийн нөхцлийг чангатгах болсоны дараа алтны үнэ буурсан байна. Долоо хоногийн хэмжээнд энэ үнэт металлын үнэ хоёр хувиар унажээ. Сүүлийн хоёр сарын турш ийм хэмжээгээр хямдарсан тохиолдол гараагүй юм.

Ингэснээр нэг унц алтны үнэ баасан гаригт 0,1 хувиар унаж, унц нь 1385,92 ам.доллар болсон нь мягмар гаригийн 1430,95 ам.доллар хүрч рекорд тогтоож байснаас огцом буурсаныг харуулж байна.

Мөнгөний үнэ харин 0,2 хувиар унаж, унц нь 28,65 ам.доллар болжээ. Мөнгөний ханш мягмар гаригт 30,68 ам.доллар болж, 30 жилийн дээд үнэд хүрээд байсан юм.