Өнгөрөгч амралтын өдөр Нийтийн эрх зүйн төвийн дарга Ц.Энхцэнгэл болон өмгөөлөгч нарын төлөөлөл энэ сард УИХ-аар хэлэлцэх гэж байгаа Өмгөөллийн тухай хуулийн шинэчилсэн найруулгын төслийг буцаах хүсэлтэй байгаагаа илэрхийллээ. Тодруулбал Хууль зүй дотоод хэргийн яам, Засгийн газраас санаачилсан дээрх хуулийн төсөл нь өмгөөлөгчдийн зах зээлд оюуны хөдөлмөрөө шударгаар үнэлэх эрхэд халдсан, ардчилсан чөлөөт нийгмээс олон жилээр ухарсан, Үндсэн хууль бусад холбогдох хуулиудыг зөрчсөн гэж үзэж байгаа аж. Өмгөөлөгчид дээрх хуульд орсон учир дутагдалтай зүйл заалтын талаар санал бодлоо солилцож, УИХ-ын гишүүдэд хандан уриалга гаргажээ. Тэдний гаргасан уриалгад “Өмгөөллийн тухай хуулийн шинэчилсэн найруулгыг Шүүхийн шинэтгэлийн хамгийн чухал хэсэг болохын хувьд хэрэг бүртгэх, мөрдөн байцаах, прокурор, шүүх, шүүхийн шийдвэр гүйцэтгэх байгууллагуудын оролцоотой, өмгөөлөгчдийн өргөн төлөөлөл бүхий ажлын зөвлөлгөөн, уулзалт, хэлэлцүүлгээр оруулж дахин боловсруулах шаардлагатай.  Эрх зүйт нийгэмд аливаа хууль тогтоомжийг гаргахдаа үйлчлэлд нь өртөх магадлалтай, хуулийн төслийн хэлэлцүүлэгт оролцох шууд сонирхол бүхий иргэдийн саналыг түлхүү харгалзан үздэг. Энэ шаардлагыг Засгийн газраас өргөн барьсан одоогийн хуулийн төсөл хангахгүй байна.

Хуулийн байгууллагуудын үйл ажиллагааг иргэншсэн нийгмийн чиг баримжаатай болгоход чухал үүрэгтэй энэ хуулийн төслийг Үндсэн хууль, эрүүгийн байцаан шийтгэх хууль, иргэний хэрэг шүүхэд хянан шийдвэрлэх тухай хууль, захиргааны хэрэг шүүхэд хянан шийдвэрлэх тухай хуулиудад нэмэлт өөрчлөлт оруулахтай уялдуулан иж бүрнээр боловсруулах ёстой. Гэтэл өмгөөлөгч 65 нас хүрсэн бол өмгөөлөх тусгай зөвшөөрлийг хүчингүй болгохоор заасан нь өмгөөлөгчдийг насаар нь ялгаварлан гадуурхсан, иргэдийн өмгөөлүүлэх, өмгөөлөгчөө чөлөөтэй сонгох эрхэд халдаж байгаа явдал. Түүнчлэн өмгөөллийн үйлчилгээг хамтран эрхлэх хэлбэр нь товчоо, товчоог холбоонд бүртгүүлэх, товчоо нь ашгийн төлөө бус хуулийн этгээд байна гэсэн нь Монгол Улсын олон хууль зөрчиж буй хэрэг юм. Мөн өмгөөллийн үйлчилгээний жишиг хөлсийг хууль зүйн асуудал эрхэлсэн Засгийн газрын гишүүнээр тогтоолгохоор төлөвлөж байгаа нь мэргэжлийн үйлчилгээний зах зээлд төрөөс зүй бусаар оролцох оролдлого гэж үзэж эсэргүүцэж байна. Иймд энэхүү саналын дагуу иргэдийн болон мэргэжлийн байгууллагын оролцоог хангах үүднээс дахин боловсруулах чиглэл өгч хуулийн төслийг батлалгүйгээр хуулийн төсөл санаачлагч Засгийн газарт буцаахыг уриалж байна” гэжээ.

Хэлэлцүүлэгт ахмад өмгөөлөгч  Л.Даваацэрэн оролцож өмгөөлөгчдийн гаргаж буй уриалгыг дэмжиж буйгаа илэрхийлээд “Би одоо 65 настай. Гэтэл энэ хуулиар бол өмгөөлөл явуулж болохгүйд хүрч байна. Ийм юм байж болох уу. Өмгөөлөгч хүн олон жил өмгөөлөл хийх тусмаа ур чадвартай, туршлагатай болдог. Энэ хуулийн төслийг санаачлагчид өмгөөлөгчдийг бусдаас хараат, хэн ч биш болгохоор зэхэж байна” гэсэн юм.