Телевизээр асуулт хариултын нэвтрүүлэг гарна. Энэ нэвтрүүлэг танин мэдэхүйн чанартай бөгөөд залуус, хүүхдүүдийн мэдлэгийн түвшинийг харуулдаг юм. Хөтлөгч, Түнтгэр өвгөн түмэн жадтай тэр юу вэ? гэж асуутал 1А ангийн нэг хүү хариуд нь: “Чингис хаан” гэж авдаг байгаа. Хөтлөгч, Монгол ардын үлгэрт гардаг хамгийн том уулыг юу гэдэг вэ? Өөр нэг жаал тэгсэн мөн л “Чингис хаан” гэж хариулав. Тухайн үед инээж баясаад өнгөрсөн ч, бидний үеийн мэддэг зүйлсээс нэгэн шинэ үеийн мэдэж буй зүйлс хэрхэн өөрчлөгдсөөр холдсоор байгааг харуулсан хариултууд байлаа…
“Сайн эцгийн нэрийг гурав худалдаж иддэг” гэж үг бий. Өнгөрсөн хорин жилийн хугацаанд ерэн оны Ардчилсан хувьсгалын нэрийг “идэж” л амьдарлаа. Гэвч юм бүхэнд цаг хугацаа байдгын адил дахин Ардчилсан хувьсгалын үнэ цэнэ, ач гавьяагаар голоо зогоох аргагүйд хүрчээ. Өнгөрөгч долоо хоногт Ардчилсан хувьсгалын ойгоо тэмдэглэн “Хонхны дуу”, тэмцэл хөдөлгөөн, улс төрийн товчоог унагаасан бахдам амжилтаа дурсацгаав. Ардчилагчдад Чингисийн одон, Алтан гадас, Хөдөлмөрийн хүндэт медаль гардуулан хорин жилийн өмнөх “гавяаг” нь шагнав. Үүгээр хорин жилийн түүхтэй ардчиллын ойн “цайллага” өндөрлөв. Шагнах хүмүүс ч дууслаа. Ардчилсан хувьсгалын он цаг ийнхүү төгсөв.
Өнгөрсөн хугацаанд энэхүү түүхэн нэрийг асган цутган “идэхдээ” бид ардчиллын үнэ цэнэ, үнэт зүйлсийг ч мөн багагүй асгасан. Газраар нэг асгарсан үнэ цэнэ алдагдан алдагдсаар, үнэт чанараа хувирган олон ч хүнийг хордуулсан. Хордсон хүмүүс нь ардчиллыг үзэн ядагчид болон өндийсөөр. Ардчиллын ачаар бидний ээж аавууд картын бараанд очерлохоо больсон ч өнөөдөр халамжийн мөнгөө авахаар дугаарладаг болов. Ардчиллын ачаар олон намын тогтолцоонд шилжсэн гэх ч намууд нь сонгогчдынхоо саналыг хуалдаж авдаг болсон. Гадаадад чөлөөтэй зорчдог болсны ачаар Солонгос, Чех рүү хар ажил хийхээр мянга мянгаараа дүрвэцгээсэн. Хувийн секторт ажиллаж, чамгүй хөрөнгө хураасан ах нар эргээд төрийн аппарат руу зүтгэдэг болж. Сонгуулиар хэнд санал өгөхөө бид мэддэг ч өгсөн санал үнэн зөвөөр тоологдоно гэдэгт итгэхээ больсон. Ганц намын хэвлэлээс өөр унших сонингүй байснаа одоо улстөрч бүр ардаа хэвлэл мэдээллийн байгууллагатай болсон. Үнэхээр олон зүйл өөрчлөгдсөн. Ингэж л харагдаж, ойлгогдож байна.
Цаг хугацаа өнгөрч шинэ үе гарч ирж байна. Ардчилсан хувьсгалыг ирж байхад төрсөн хүүхдүүд ардчилалтай хамт хорин нас хүрлээ. Тэд өмнөх нийгэм ямар байсныг мэдэхгүй тул ардчиллын үнэ цэнийг ойлгохгүй. Улсаасаа гарах нь битгий улс дотроо зорчихдоо “явах бичиг” авдаг байсан гэхэд итгэхгүй. Малаа заасан хэмжээнээс өсгөж болохгүй гэх дүрмийг ойлгохгүй. Юунд итгэх ёстой, яаж амьдрах ёстойг заадаг байсан зааврыг бас мэдэхгүй. Энэ бүхнийг мэдэхгүй шинэ үеийнхэн ардчилсан хувьсгалын нэрээр “хооллох” аргагүй. Бетховен бол нохойны нэр, Микеланжело бол компьютерийн вирус, “Ардчилал” гэдгийг Монголд байдаг хоёр намын нэгнийх нь нэр гэж л мэдэх цоо шинэ үеийнхэн ирж байна. Тэдний хувьд Ардчилсан хувьсгалын анхны 13, Улс төрийн товчоог буулгасан сүрт жагсаал, анхны өлсгөлөн энэ тэрийг өнгөрсөн хавар иргэний хөдөлгөөнийхөн Сүхбаатарын талбайд хэвтэж байгаад сонгуульд амласан 1,5 саяыг өгүүлэхээр эрх баригчидтай гэрээ хийсэн, эсвэл нэг нь өлсгөлөн зарлахаар нөгөө нь зөрүүлээд өлсгөлөн “өлсгөлөнгийн эсрэг өлсгөлөн” зэргээс нэг их ялгаж ойлгохгүй. Тэгэхээр одоо яах вэ?