Холливуудын алдарт хос Брэд Питт, Анжелина Жоли нар үнэт эдлэлийн загвар зохион бүтээж, анхны бүтээлээ өнгөрсөн тавдугаар сард худалдаанд гаргаж байсан билээ.

Тус үнэт эдлэл нь “Хамгаалагч сахиус” нэртэй ба Лондонгын тансаг бараа бүтээгдэхүүнээр алдартай “Asprey” фирмтэй хамтран, цөөн тоогоор гаргасан юм.  Хосууд 2006 онд охин Shiloh-гоо төрүүлэх гэж байхдаа гэр бүлийг хамгаалагч сахиус хэмээх могойн дүрстэй бөгж зүүдэг байсан гэнэ. Тэр бөгжнөөсөө санаа авч энэхүү сахиусныхаа загварыг гаргасан аж.

Уг сахиусны толгой нь гэр бүлийн хамгаалагч сахиус гэгддэг могойн дүрстэй бөгөөд 18 кратын цагаан алтаар хийсэн байна. Сахиусны эх биеийг бүхэлд нь хар алмаазаар чимэглэж, могойн нүдийг маргад эрдэнийн чулуугаар хийжээ. Үнийн хувь 11,000 доллар.

Энэхүү бүтээл нь тун ажилттай худалдаалагдсан учраас хосууд дахин үнэт эдлэлийн загвар зохион бүтээж, шинэ загваруудаа худалдаанд гаргахаар төлөвлөөд байгаа гэнэ. Энэ удаад “Asprey” фирмийн гүйцэтгэх захирал Роберт Прокоптой хамтран ажиллах аж.