-Танай намын бүлэгт харьяалагдаж байсан Ц.Шинэбаяр гишүүн ямар журмаар бүлгээс гарсан бэ. Хэлж мэдэгдсэн үү?
-Ц.Шинэбаяр гишүүний хувьд бүлэг дээр хэлж ярилцсан зүйлгүй. Бүлэг дээр гишүүнийг намаас хасах тухай асуудал байхгүй.
-Гишүүн бүлгээс яаж гардаг вэ. Өргөдөл өгдөг үү, автоматаар гардаг юм уу. Ц.Шинэбаяр гишүүн одоо сул гишүүн гэж явах уу?
-Өргөдөл өгөөгүй. Бидэнд түүнийг шийдэх талаар ярьсан зүйл ч алга. Яг бүлэг дээр орж ирж асуудал хөндөгдөөгүй. Ц.Шинэбаяр гишүүн өөрөө мэдээлэл хийхдээ МАХН-даа үлдсэн учраас энэ бүлэгт багтахгүй гэсэн санаа хэлж байх шиг байсан. Тийм тохиолдолд бүлэгт үлдэнэ гэсэн ойлголт байхгүй болох байх.
-Ц.Шинэбаяр гишүүн бүлгийнхээ хуралд суухгүй байгаа юу?
-Суухгүй байна.
-Танай бүлгийн удирдлага албан ёсоор гишүүнтэй уулзсан болов уу?
-Д.Лүндээжанцан дарга гурван удаа уулзаж санал бодол солилцсон байсан. Ц.Шинэбаяр гишүүн бүлгийн хуралд сууна ч гээгүй, суухгүй ч гэж хэлээгүй юм билээ. Д.Лүндээжанцан дарга сонголт чинь зөв үү, нухацтай бодоорой гэж зөвлөх маягаар уулзсан байна лээ.
-МАН-ын ерөнхий нарийн бичгийн дарга У.Хүрэлсүх Ц.Шинэбаяр гишүүнд бодох цаг хугацаа өгье гэсэн байсан. Бүлгийн зүгээс тийм зүйл хэлсэн үү?
-Тийм зүйл хэлээгүй. Яагаад гэвэл бүлэгт энэ тухай асуудал яригдаагүй.
-Ц.Батбаяр гишүүн өнгөрсөн зургадугаар сараас бүлгийн хуралд суугаагүй гэсэн.
Тэр ямар учиртай вэ?
-Ц.Батбаяр гишүүн бүлгийн хуралд алдаг оног сууж яваа. Огт суугаагүй ч биш юм. “Утаагүй Улаанбаатар” хөтөлбөр орж ирэх үед “Их бүтээн байгуулалт” нэртэй болчихлоо. Хуучин нэрээрээ байх ёстой юм. Бүлэг буруу шийдэл гаргалаа” гэсэн маягаар гоморхсон. Заримдаа орж ирж бухимддаг байсан. Эртээд Төсвийн байнгын хорооны хурлын дараа одоо бүлгийн хуралдаа эргэж тасралтгүй сууна гэдгээ хэлж ойлголцоод явсан. Бүлгийн дарга Д.Лүндээжанцан ч уулзсан. Би ч уулзсан. Одоогоор Ц.Батбаяр гишүүн эмнэлэгт хэвтэж байна. Гадагш дотогш ч нэлээд явсан. Цаашдаа хуралд суухгүй гэсэн зүйл байхгүй.
-Хуралдаа суугаач, чухал асуудал хэлэлцэж байна гэж Ц.Батбаяр гишүүнд сануулж байсан удаа бий юү?
-Нэг их тусгайлж хэлсэн зүйлгүй. Бүлгийн хурал болно гэдгийг бүх гишүүндээ мессэжээр мэдээлдэг. Гишүүд ирж суудаг.
-Бүлгийн дүрэм гэж байдаг уу?
-Байдаг. Хэрэв гишүүн бүлгээс гарахаар бол өргөдлөө өгнө.
-Хуралдаа суухгүй байгаа гишүүдэд сануулга өгдөг үү?
-Сануулга өгнө. Анхааруулна. Сүүлийн бүлгийн хурал дээр гэхэд ирцээ чангаруулъя гэж ярилцсан. Долоо хоног бүрийн ажлын хэсэг, бүлэг, байнгын хороо, чуулганы хуралдааны ирцийг самбар дээр тавьж байна. Гишүүдийн гаргасан үнэтэй саналуудыг ч 14 хоногоор нэгтгэж холбогдох газруудад нь хүргүүлж, хариуг мэдээлж байна.
-МАХН гэдэг нэрээр сонгуульд орсон бүлэг МАН болсныг хууль эрх зүйн хувьд яаж зохицуулсан бэ?
-Улсын дээд шүүхэд МАН болсноо бүртгүүлсэн. Ганц Х үсэг л өөрчлөгдсөн. Бусад нь хэвээрээ. Тэр утгаараа бид манай бүлэг МАН-ын бүлэг боллоо гэдгээ УИХ-ын даргад танилцуулж, бүлгээс илгээсэн бичгийг УИХ-ын дарга чуулганы хуралдаан дээр танилцуулсан. Бүлэг бол МАН-ын бүлэг гэсэн нэртэй болж байгаа юм байна гэдгийг танилцуулаад үйл ажиллагаагаа үргэлжлүүлээд явсан.