-Та саяхан Токио хотноо болсон олон улсын тэмцээнээс алтан медаль хүртсэн байна. Энэ тэмцээний талаар яриагаа эхлүүлье.
-Японы нийслэл Токио хотод өнгөрсөн сарын 28-нд болсон жиу-жицугийн олон улсын тэмцээнд манай улсаас гурван тамирчин оролцож, ахмадын ангилалд өрсөлдсөн Б.Мөнх-Учрал бид хоёр алтан медаль хүртлээ. Миний хувьд 82 кг-ын жинд өрсөлдсөн. Харамсалтай нь, манай Г.Дашдаваа барилдааны үед шагайндаа гэмтэл авсан тул тэмцээнээ дуусгаж чадаагүй. Энэ тэмцээнд олимпийн наадамд оролцож байсан дэлхийн цуутай тамирчид ирж оролцсоноороо онцлог болсон.
-Жиу-жицугийн спортын тухай та товч танилцуулаач. Анзаарч байхад манай жүдочид нэлээд сонирхож байгаа бололтой?
-Жүдотой төстэй л дөө. Гэхдээ гол мэх нь хөл, гарт өчих. Боох мэхээр цэвэр ялдаг. Хэрэв боолт байхгүй тохиодолд унагаах, хэвтээ барилдааны үзүүлэлтээр оноо өгдөг дүрэмтэй. Онооныхоо үзүүлэлтээр ялалт байгуулна. Онооны илт давуугаар ялна гэсэн ойлголт байхгүй. Цаг дууссан нөхцөлд онооны чанарыг хараад аль их оноотой нь ялна.
-Жиу-жицу барилдаан Бразилаас гаралтай гэж сонссон?
-Жиу-жицу дотроо хоёр төрөл бий. Нэг нь Японоос гаралтай, өшиглөдөг, цохидог. Харин бразилийн жиу-жицу нь цохилцохгүй, зөвхөн хэвтээ байдлаар барилддаг. Fighting төрөлд бразил жиу-жицучид их алдартай л даа. Ялангуяа Америкт өндөр төвшинд хөгжсөн. Бүх муж, хотуудад бараг гудамжны булан, тохой болгонд жиу-жицугийн клубууд байдаг. Хөгжлөөрөө жүдо бөхөөс ч илүү, 90:10 хувьтай гэж болно.
-Саяхан та бүхний зохион байгуулсан УАШТ бразил жиу-жицуд хамаарах уу?
-Тийм ээ. Өмнө нь манайхан 2008 онд Япон жиу-жицугийн Азийн аварга шалгаруулах тэмцээнд оролцож, Д.Мөнхбаясгалан түрүүлж байсан. Японы жиу-жицу нь зодолддог болохоор тулааны спортынхон илүү өндөр амжилт гаргах боломжтой.
-Бразилийн жиу-жицу үүсч хөгжөөд хэр удаж байгаа спорт вэ?
-Жиу-жицуг жүдо бөхийн эцэг спорт гэдэг. Эрт дээр үеэс, бараг гурав, дөрвөн зуун жилийн өмнө Бразилд дэлгэрээд, бразилчууд түүнийгээ өөрсдийн үндэсний спорт болгон авч үлдсэн байдаг юм. Тэр ч утгаараа бразилд өндөр хөгжсөн, энэ спортоор бразилчууд мундаг, хүчтэй. Fighting-ийн төрөлд ч бразилийн жиу-жицучид өндөр амжилт үзүүлдэг. Энэ спортын нөлөө Америкт ч асар өндөр. Нэг тэмцээн болоход хамгийн багадаа л 1000 гаруй тамирчин оролцож байна.
-Монголд жиу-жицугийн холбоо хэзээ байгуулагдсан бэ?
-Бид анх 2007 онд Азийн аварга шалгаруулах тэмцээнд оролцож ирснийхээ дараа Монгол Улсдаа жиу-жицугийн холбоог үүсгэн байгуулахаар сэтгэл шулуудсан. Энэ жилээс бүстэй барилдаан, жиу-жицугийн холбоог нэгтгэж, Монголын жиу-жицу, бүстэй барилдааны нэгдсэн холбоо нэртэй болгосон байгаа. Азийн холбоо бас нэгдсэн хэлбэртэй байдаг. Өмнөд Солонгост ч мөн адил.
-Бүстэй барилдааны тухай сонирхуулаач?
-Бүстэй барилдаан бол татараас гаралтай. Тэндхийн үндэсний бөх л дөө. Зөвхөн баруун золгодог. Манай үндэсний бөхчүүд энэ төрөлд амжилт үзүүлэхэд нэлээн ойр спорт. Сая ч гэсэн бүстэй барилдааны улсын аварга шалгаруулах тэмцээнээр үндэсний бөхчүүд маань сайн барилдсан. Гол нь зөвхөн баруун золгодог, унагалтын үзүүлэлтээр оноо авдаг. Жүдотой харьцуулж тайлбарлавал, иппонд нь цэвэр ялалт өгөөд, вазарид нь гурван оноо, юүко шиг унагахад нь хоёр, коко шиг унагахад нь нэг оноо өгөх жишээний.
-Жингийн ангиллын хувьд?
-Жүдо бөхтэй яг ижил. Эрэгтэй, эмэгтэй долоон жинд барилдана.
-Бүстэй барилдааны онцлог нь чухам юундаа байна вэ?
-Гол нь бүс. Ямар ч үед бүсээ тавьж болохгүй. Алдсан тохиолдолд шууд торгоно, гурван удаа торгуулвал барилдаан шууд зогсоно. Мэх хийж байсан ч, хамгаалж байсан ч, өрсөлдөгчөө унагааж, өөрөө унаж байсан ч бүсээ барьж байх ёстой. Ер нь бразилийн жиу-жицу болон бүстэй барилдаан тамирчдын хувьд эрсдэл багатай, гэмтэл бэртэлд өртөх нь харьцангуй бага.
-Монголчууд маань бөхөд авьяастай болохоор жиу-жицугийн төрөлд ч бас амжилт гаргах боломжтой байх?
-Тийм ээ. Нэг үеэ бодвол хүмүүс жиу-жицуг мэддэг болсон байна. Саяхан болсон улсын аварга шалгаруулах тэмцээн амжилттай болсонд их урамшсан. Хүмүүс ч нэлээд сонирхож үзлээ.
-Улсын аварга шалгаруулах анхдугаар тэмцээн хэр өргөн цар хүрээг хамрав. Хэдэн тамирчин өрсөлдсөн бэ?
-Жиу жи-цу болон бүстэй барилдааны улсын аварга шалгаруулах анхдугаар тэмцээнийг Монголын цахилгаан холбоо компаниас ивээн тэтгэж явууллаа. Жиу-жицугийн улсын аваргад 110 гаруй, бүстэй барилдаанд 140 гаруй тамирчин оролцсон. Зарим тамирчид аль аль төрөлд нь өрсөлдсөн байгаа. Нийтдээ 20 гаруй байгууллагын тамирчин оролцсон. Ялангуяа бүстэй барилдаанд илүү олон тамирчин, тэр дундаа чөлөөтийнхөн их орсон.
-Чөлөөт бөхийнхөн бүстэй барилдаанд зодоглох боломжтой хэрэг үү?
-Гадны улс орнуудад бүстэй барилдаанд чөлөөтийнхөн илүү өндөр амжилт үзүүлдэг. Нэн ялангуяа сонгомол бөхийнхөн. Дэлхийн аварга шалгаруулах тэмцээнд гэхэд л Оросын сонгомол бөхийнхөн маш сайн оролцдог.
-Жиу-жицугийн спортоор манай тамирчид олон улсын тэмцээнээс олон медаль хүртэж, амжилт арвинтай байгаа. Харин бүстэй барилдаанаар Монголын тамирчид олон улсын тавцанд ямар амжилт гаргаж байсан бэ?
-Х.Цагаанбаатар 2006 онд дэлхийн аварга болж байсан. Мөн Б.Ариун-Эрдэнэ дэлхийн аваргын мөнгөн медальтай. Бас тэр жил болсон анхны Азийн аварга шалгаруулах тэмцээнээс Н.Түвшинбаяр алт, С.Мияарагчаа мөнгө, н.Тэнгис хүрэл медаль хүртэж байсан. Дараа нь, 2008 онд Киргизид болсон Азийн аваргаас би хүрэл медаль авсан.
-Жиу-жицугаар тууштай хичээллэж байгаа тамирчин хэр олон байна вэ?
-Г.Дашдаваа, С.Мияарагчаа бид хэд л байна. Гэхдээ хүүхэд, багачууд жиу-жицугаар идэвхтэй хичээллэж эхэлсэн. Жүдогийн бэлтгэлийн үеэр давхар жиу-жицугийн бэлтгэл хавсарч хийж байгаа. Хэвтээ барилдаандаа сайжирна гэсэн үг л дээ. Ер нь бразилийн жүдочид хэвтээ барилдаандаа мундаг, энэ нь жиу-жицутай холбоотой. Жиу-жицуд суурьтай, тэгэхээр жүдод үзүүлж байгаа амжилт нь голдуу хэвтээ барилдаанаас байдаг. Жуи-жицуг жүдогийн дагавар спорт маягаар зэрэг хөгжүүлбэл жүдогийн тамирчдад маш том дэмтэй. Хэвтээ барилдаандаа сайжирна. Бас заавал жүдо ч гэлтгүй дан энэ спортоор хичээллээд цаашдаа fighting-т өрсөлдөх боломжтой. Тулааны тамирчин Д.Мөнхбаясгалан гэхэд л манай холбооны журмаар Америкт амьдарч, жиу-жицугаар хичээллэж байна. Америкт манай таван тамирчин байгаа.