Засгийн газрын шийдвэрээр Соёл урлагийн дээд сургууль нэртэйгээр одоогийн байрандаа үйл ажиллагаа явуулаад 20 жил болж буй Соёл урлагийн их сургууль/СУИС/-д өнөөдөр НИТХ-ын дарга Т.Билэгт зочилжээ. Сургуулийнхаа 20 жил, Монгол Улсад дээд боловсролтой урлагийн мэргэжилтэн бэлтгэж эхэлсний 50 жилийн ойг ирэх сарын эхээр тэмдэглэх гэж буй тус сургуулийнхан хотын “спикер”-т ойгоо угтан хийж буй ажлуудаа танилцуулж, урлагийн тоглолтоор “дайлан”, ойн үеэр болох үйл ажиллагаандаа оролцохыг урьсан байна. СУИС-тай хотын соёл, ялангуяа хотын иргэдийн дунд хотын соёлыг дэлгэрүүлэх, хотын иргэн бэлтгэх талаар хамтран ажиллах шаардлагатай байгааг Т.Билэгт уулзалтын үеэр онцолсон. Тус сургуулийн удирдлагууд ч мөн 10 жилийн хүүхдүүд, хорооны иргэдэд лекц унших, сургалт явуулах зэргээр хотын соёлыг түгээн дэлгэрлүүлэх талаар хоттой идэвхитэй хамтран ажиллахаар төлөвлөж буйгаа танилцуулжээ.