МАХН-ынхан Ардын намын удирд­ла­гууд­тай шүүхдэлцэхээр болжээ. Ардын намынхан өнгөрсөн хугацаанд МАХН-ынхныг элдвээр до­ромжилж, гүтгэж, дайрч давшилсан учраас тэр гэнэ. УИХ-ын гишүүн, МАХН-ын дэд дарга Ц.Шинэбаяр, Ерөнхий нарийн бичгийн дарга Н.Удвал, нарийн бичгийн дарга Л.Цог нар энэ тухай өнгөрсөн баасан гарагт хэвлэлийн бага хурал хийлээ. МАХН-ынхан Үндсэн хуулиар ол­госон эрхийнхээ дагуу эвлэлдэн нэгдэж нам байгуулсан. Гэтэл энэ эрхийг нь Ардын на­мын удирдлагууд зөрчиж “МАХН-тай хол­боотой бүхэн Ардын намын өмч” гэж үзэж байгаа нь хууль зөрчсөн үйлдэл гэж Н.Удвал тайл­барлалаа. УИХ-ын гишүүн Ц.Шинэбаяр “Хуу­лийн тайлбарыг зөвхөн Дээд шүүх гаргадаг. Гэтэл Ардын намын дарга Дээд шүүхийн өмнөөс Улс төрийн намын тухай хууль тайлбарлаж байгаа нь ёс зүйгүй төдийгүй хууль зөрчсөн үйлдэл” гэлээ. Үүнээс гадна Улс төрийн намын тухай хуулийн 15 дахь зүйлийн 15.6 дугаар заалт Үндсэн хууль зөрчсөн гэх гомдлыг Үндсэн хуулийн Цэцэд хүргүүлснээ МАХН-ын нарийн бичгийн дарга Л.Цог тайлбарлав. Мөн Ар­дын намын залуус жагсаал хийж МАХН-ын зарим удирдлагыг элдвээр доромжилсон уч­раас Сүхбаатар дүүргийн шүүхэд гомдол гар­гаад байгаа аж. Мөн “Ардын намынхан хэв­лэлийн бага хурал хийх бүртээ МАХН гэдэг нэрийг өмчилж байгаа нь шүүхэд хандах бас нэг үндэслэл болсон” гэж Л.Цог хэллээ. МАХН-ын Ерөнхий нарийн бичгийн дарга Н.Удвал “Би МАХН-ыг 160 мянган гишүүнтэй гэж олон жил итгэж ирсэн. Гэтэл тэр тоо худал байсан. Одоо ч Ардын намынхан 165 мянган гишүүнтэй гэж мэдээлж байгаа нь эр­гэл­зээтэй” гээд “МАХН-ын 90 жилийн ойг бид тэмдэглэнэ. Монголд хууль хэрэгждэг бол МАХН-ыг Дээд шүүх бүртгэх ёстой. Үүнд эргэлзэх зүйлгүй” гэж онцолсон. МАХН-ын­хан намаа бүртгүүлэх талаарх өргөдлийг Дээд шүүхэд өнөөдөр хүргүүлэх гэж байгаагаа хэв­лэлийн бага хурлын үеэр зарлалаа. Мөн Ар­дын намын удирдлагуудыг мэтгэлцээнд урьж бай­гаагаа мэдэгдсэн юм.

МАХН-ын түр штабын зохион байгуулагч ги­шүүний мэдээлснээр Монгол ардын хувьсгалт нам байгуулбал, элсэхээ мэдэгдсэн иргэдийн тоо 20 мянга орчим байгаа аж. 

Хэвлэлийн бага хурлын үеэр МАХН-ын нарийн бичгийн дарга Л.Цогоос зарим асуултад хариулт авлаа.

-Ардын намынхан Монгол ардын хувьс­галт нам нэртэй нам байгуулах хууль зүйн үндэсгүй гэж тайлбарлаж буй. Улс төрийн намын тухай хуульд энэ тухай тодорхой заа­сан юм биш үү?

-Улс төрийн намын тухай хуульд тусгаар тогтнолын эсрэг, шашны болон фашист нам бай­гуулж болохгүй гэж л заасан байдаг. Дээрх гурван үндэслэл л биш бол ямар ч нам бай­гуулж болно. Хуульд зааснаар гишүүнчлэл бол намын өмч биш. Гэтэл Ардын намынхан 160 мянган гишүүнтэй гээд түүнийгээ бидний өмч гэж зарлаж байгаа нь Үндсэн хуульд заа­сан хүний эрхийг зөрчиж байгаа хэрэг. Ерэн жилийн түүхтэй МАХН-ын гишүүдийн эр­хийг ингэж хоморголон зөрчиж болохгүй. Улс төрийн намын тухай хуульд үзэл бодлын дагуу эвлэлдэн нэгдэж нам байгуулах эрхтэй гэж заасан. Гэтэл Ардын намынхан уг хуу­лийн хаалттай гэсэн заалт бүрийг өөрийн өмч шигээ тайлбарлаж байна. Иймээс бид Ар­дын намынхныг шүүхэд өгөхөөр болсон. Мөн Улс төрийн намын тухай хуулийн 15 ду­гаар зүйлийн 15.6-г өөрчлөх талаар Үндсэн хуу­лийн Цэцэд гомдол гаргасан. Уг хуульд ийм зүйл, заалт байсныг 2005 онд хүчингүй бол­госон.

-Ардын намын залуус жагсаал хийсэн нь хууль бус үйлдэл гэж шүүхэд өгч байгаа нь ир­гэдийн үзэл бодлоо илэрхийлэх эрхийг зөрчиж байгаа юм биш үү?

-Тэд үзэл бодлоо илэрхийлж жагсаагүй. МАХН-ын удирдлагуудыг дайрч доромжилж, элдвээр гүтгэх гэж жагссан учраас бид нэр төрөө сэргээлгэх гэж шүүхэд хандана. Мөн манай намыг Дээд шүүхэд бүртгүүлэх хуу­лийн хугацаа дууссан гэх мэт яриа гарсан. Хуу­лиараа 21 хоногийн дотор намаа Дээд шүүхэд бүрт­гүүлэх ёстой. Энэ хугацаа дуусаагүй байгаа.

Зохиогчийн эрх:
"Улс төрийн тойм" сонин