Ерөнхийлөгч асан Н.Энхбаярын намын даргаар нь ажиллаж байгаа МАХН маргааш Дээд шүүхэд 801 хүний гарын үсгийг “гардуулах” гэнэ. Дээд шүүхэд өргөдөл өгсөн хугацаа нь өнөөдөр дуусах тул албан ёсоор Монгол ардын хувьсгалт намыг шинээр бүртгүүлэх өргөдлөө ийн өгөх аж.

Дээд шүүхээс “Одоогоор манайд МАХН гэсэн товчлолтой улс төрийн нам байхгүй” гэсэн албан бус тайлбарыг өнгөрсөн хугацаанд өгч байсан. Харин Монгол ардын хувьсгалт нам гэсэн нэрээр тус намыг бүртгэх боломжтой эсэх тухайд ямар нэгэн тайлбар өгөөгүй юм. Иймд Монгол ардын хувьсгалт нам гэдэг нэр одоогийн Монгол Ардын намд үлдсэн эсэх тухайд болон Ерөнхийлөгч асан Н.Энхбаярт хуучин намаа сэргээн авах боломж байгаа, үгүйд тун удахгүй тодорхой хариулт гарах бололтой.