Реппер Nelly
саяхан төрсөн өдрийн баяраа нижгэр
тэмдэглэн өнгөрүүлжээ. Өдгөө 36 настай түүний хувьд эдгээр өдрүүдэд тэмдэглэн өнгөрүүлэх олон баяр давхцаж байна.
2008 онд гаргасан “Brass
Knuckles” цомгоосоо хойшхи анхны
студийн цомог болох “5.0”
нэртэй шинэ өнгө аястай, шинэ цомгоо
фенүүддээ өргөн бариад удаагүй байгаа юм.
Миссуригийн
Сент-Луис хотын гудамжинд үглэж, дуулж, бүжиглэж явсаар хип-хоп хөгжмийн дэлхийн томоохон төлөөлөл болж чадсан тэрбээр 2000 онд “Country Grammar” нэртэй анхны синглиэ гаргаж байв. Түүний дебут цомог нь дэлхийн
хэмжээнд есөн сая хувь борлогдсон юм. “Hot in Herre”, “Dilemma” гээд түүний хит дуунууд олон бий. Харин саяхан гаргасан түүний “Just a Dream” дуу өдгөө бүх радиогоор цацагдаж байна.
–“Just a Dream” дуундаа та хэний тухай
дуулсан юм бэ?
-Би энэ дуугаа
дэлхий нийтийн сонорт хүргэхийг л зорьсон. Тэр маань ч биелж байх шиг байна.
-Та одоо ганц бие байгаа юу?
-/Инээв/. Би
гэрлээгүй ээ, гэрлээгүй. Үүнийг л хэлэх байна.
-Асуултаас бултаж байх шив дээ?
-Бид бүгд л өмнө нь хайрлаж, бас хаягдаж
байсан. Бүгд ялгаагүй. Хүүхэд, нас бие гүйцсэн залуу, бүсгүй гээд л. Хэн ч ялгаагүй гайхамшигтай, гашуун
хайрын амтыг амсдаг шүү дээ.
-Тэгвэл та хэнд тэгтлээ сэтгэл алдарч байсан хэрэг
вэ?
-Зургадугаар
ангид байхдаа шинжлэх ухааны хичээл заадаг байсан багшдаа дурлаж байлаа.
Хатагтай Уолкер. Тэр үнэхээр гайхалтай эмэгтэй байсан /инээв/.
-Багш тань үүнийг мэдсэн болов уу?
-Магадгүй л юм. Тэр үед би сахилгагүй жаал байлаа.
-Шинэ цомогт тань багтсан “Gone” дуундаа та Kelly Rowland-тай дахин хамтарсан байсан /өмнө нь тэд 2002 онд
Dilemma дууг хамтран дуулж, хит болж байлаа/. Өнгөрсөн хугацаанд та хоёр
холбоотой байсан юм уу?
-Тэр яг л миний
охин дүү шиг байдаг юм. Kelly-тэй уулзах сайхан байдаг. Ялангуяа одоо Kelly
dance хөгжмийн салбарт ихээхэн
амжилт олоод байгаа. Үнэхээр гайхалтай хэрэг шүү. Лондонд очоод түүнтэй уулзах хэрэгтэй гэж зөвлөх байна.
-Танд хэзээ нэгэн цагт “Ингээд л бүхнийг дуусгая” гэсэн бодол төрж байв уу?
-Охин дүү маань 2005 онд нас барсны
дараа надад асар их зүйл бодогдсон /Nelly-гийн
охин дүү Jacki
Donahue өвчний улмаас нас барсан билээ. Тухайн үед Nelly-гийн байгуулсан Jes Us 4 Jackie сан охин дүүд нь тохирох ясны чөмөгний донор олж чадаагүй юм/. Хэн нэгнийг алдсаны дараа бүхнийг эхнээс нь дахин тунгаах хэрэг гардаг байх. Бага
байхдаа бид хамт байж чадаагүй л дээ. Эх өөртэй байсан болохоор нөхцөл байдлаас шалтгаалаад бид тусдаа өсч торнисон. Харин өсч томрохын хирээр бидний
харилцаа улам бэхжиж, дүү маань миний хувьд юунаас ч
илүү эрхэм нандин болж
хувирсан юм. Тэр миний дүү байсан, түүгээр ч зогсохгүй стилист минь байж, намайг
халамжиж, бүхнийг зөвлөдөг байлаа.
–Та 2003 онд “Tip Drill” дууныхаа видео клипийг гаргаж, хэвлэл,
мэдээллийнхний бай болж байсан. Тухайн үед хүмүүс таныг янз бүрээр л ярьж байсан?
-Тийм ээ, тэр
жаахан солиотой зүйл болсон. Гэхдээ ганцхан
видео клипнээс болоод хүмүүс миний бүхий л уран бүтээлийг шүүж, шүүмжилж байсан. Чухам юу хийж бүтээсэн нь тэдэнд хамаагүй юм шиг л байсан. Таван минутын видеоноос болоод тэр
шүү дээ. Тэр видео
зарим хүмүүст таалагдаагүйг би ойлгож байна, тэр бол тэдний хувийн үзэл бодол. Гэхдээ тэр клип шөнийн гурван цагт телевизээр
гарах, томчуудад зориулсан видео байсан юм.
-Арай өөрөөр хийх ёстой байсан юм болов уу гэж бодогдож байв уу?
-Энэ тохиолдолд ямар
нэг байдлаар буруу зүйл хийсэн юм шиг санагдсан гэж хэлэх ёстой байх л даа. Үнэнийг хэлэхэд надад тэгж
санагдаагүй. Хүмүүс л үүнийг өөр өнцгөөс, буруугаар ойлгож байна
гэж бодсон.
-Та ер нь хэвлэлийнхэнтэй давс, хужрыг нь
тааруулаад эвтэйхэн харьцчих юм аа. Ингэхэд та хүнтэй гэрлэж, хүүхэдтэй болохыг хүсдэг үү?
-Мэдээж тийм. Би
хүү, охин хоёртой. Дүү маань нас барсны дараа хоёр
хүүхдийг нь би өөр дээрээ авсан. Одоо бол дөрвөн хүүхэдтэй л гэж хэлдэг. Өнөр өтгөн гэр бүл сайхан шүү дээ. Цаашдаа хүүхэд өргөж авна гэсэн бодолтой
байдаг. Хэн нэгний сайн
сайхны төлөө хүүхэд үрчилж авна гэдэг амьдралын
сайн сайхан зүйлсийн нэг гэж бодож байна.
С.Цэлмэг