Азийн наадамд оролцож буй Монголын ширэн бээлийтнүүдээс өнөөдөр эмэгтэйчүүдийн 69-75 кг-ын жингийн ангилалд Э.Ундрам, эрэгтэйчүүдийн 69 кг-д Ж.Отгонжаргал нар хагас шигшээгийн тулаанаа хийх гэж байна. Даваа гаригт эхний тулаанаа хийж, Киргизстаны тамирчин Гулзат Мусабаеваг 11:3 харьцаатай илт давуу буулган авсан С.Ундрам өнөөдөр хагас шигшээд буюу мөнгөн медалийн төлөө БНСУ-ын тамирчин Сён Сү-ёнтой тулалдах юм. Тулаан 14.30 цагаас эхэлнэ.

Харин Ж.Отгонжаргалын тухайд эхний тулаанаа Афганистаны боксчин Нажибллах Азимитай хийж, 6:1 харьцаагаар ялснаар шөвгийн наймд шалгарч, улмаар Филиппиний Уилфредо Лопезийг 7:1 харьцаатай буулган авсан билээ. Тэрбээр өнөөдөр 16.15 цагаас мөнгөн медалийн төлөө дэлхийн хошой аварга, 2009 оны Миланы дэлхийн аваргын хүрэл медальт, “Доха-2006” наадмын хүрэл, 2007 онд Улаанбаатар хотноо болсон ААШТ-ий алтан медальт, Казахстаны шилдэг тамирчин Серик Сапиевтай тулалдах бөгөөд ялсан тохиолдолд аваргын алтан медалийн төлөө өрсөлдөх эрхтэй болох юм.

С.Цэлмэг