АН-ын “Ээлжит бус их хурлын төлөө хөдөлгөөн” намын даргадаа хандан шаардлага гаргаж байгаа тухайгаа сэтгүүлчдэд мэдээллээ. Тэд ээлжит бус их хурал хуралдуулах асуудлыг ҮЗХ-ны хурлаар хэлэлцүүлээгүйд намын дарга Н.Алтанхуягийг буруутгаж, эл асуудлыг дахин хэлэлцүүлэхийг шаардаж байна. Мөн УИХ-ын үйл ажиллагаанд Засгийн газрын оролцоог хязгаарласан 1992 оны Үндсэн хуулийн заалтыг сэргээх ёстой гэж үзлээ. Шаардлагад дурдсан хоёр асуудлаар 12 дугаар сарын 10-ны дотор хариу мэдэгдэхийг АН-ын дарга Н.Алтанхуягаас хүслээ.
“Ээлжит бус их хурлын төлөө хөдөлгөөн” нь намын жирийн гишүүдийн үүсгэл санаачлагаар байгуулагдсан сайн засаглалыг бэхжүүлэх, нийгмийн өмнө хүлээх үүрэг хариуцлагыг дээшлүүлэх зорилготой хөдөлгөөн гэдгээ хэвлэлийн хурлын үеэр онцоллоо. Мөн сайн засаглалыг бэхжүүлэх, шударга ёсыг тогтооход Ардчилсан нам чухал үүрэгтэй бөгөөд засаглал хуваах онолд суурилсан парламентийн үйл ажиллагааны ил тод, нээлттэй, хяналттай байх зарчимд тулгуурлан сөрөг хүчний байр сууриа эзлэх ёстой гэж үзэж буй юм байна. Түүнчлэн УИХ-ын гишүүн Засгийн гарын гишүүн байх боломжийг олгосноор Засгийн газар өөртөө зориулсан хууль батуулах, УИХ, Засгийн газрын үйл ажиллагаанд хяналт тавих чадваргүй болгож, орлого хуваарилах механизмыг муутгаж төрийн нэрийг барьж бизнес хийх боломжийг бий болгож байна гэв. Үндсэн хуулийн энэ өөрчлөлт нь хүний дарангуйлал тогтоод байх үед бий болсон өөрчлөлт гэж үзжээ.