“Гуанжоу-2010” Азийн XVI спортын их наадмын боксын тэмцээн долоо дахь өдрөө үргэлжилж байна. Өнөөдөр манай ширэн бээлийтнүүдээс эмэгтэйчүүдийн 69-75 кг-ын жингийн ангилалд Э.Ундрам 16.00 цагаас анхны тулаанаа Киргизстаны тамирчин Гулзат Мусабаеватай хийх бол 20.00 цагаас эрэгтэйчүүдийн 64 кг-д Б.Түвшинбат шөвгийн наймд Энэтхэгийн Кумар Сантош Виротутай тулалдах юм. Түүнчлэн эрэгтэйчүүдийн 69 кг-д Ж.Отгонжаргал Филиппиний Уилфредр Лопезтай тулалдана. Тулаан 21.30 цагаас эхлэх юм.
Өчигдөр манай тамирчдаас М.Нандинцэцэг, О.Сувд-Эрдэнэ, Д.Отгондалай нар Азийн наадмын рингэнд гарч тулалдсан боловч бүгд ялагдсанаар рингнээс буусан. Эмэгтэйчүүдийн 48-51 кг-ын жинд өрсөлдсөн М.Нандинцэцэг Японы тамирчин Аяа Шинмотод 8:4 харьцаатай ялагдсан бол эмэгтэйчүүдийн 57-60 кг-ын ангилалд О.Сувд-Эрдэнэ 8:2-оор Энэтхэгийн Преети Бенивалд ялагдсан байна. Харин Д.Отгондалайн хувьд “Доха-2006” Азийн наадмын алтан медальт, БНХАУ-ын Ху Чинтэй тоглож, 6:2 харьцаагаар ялагджээ.
Ийнхүү Азийн наадмын боксын тэмцээний зургаан өдрийн дараах байдлаар манай 11 тамирчин Гуанжоугийн рингэнд гарч тулалдсанаас ес нь ялагдаад байна.
С.Цэлмэг