УИХ дахь Ардчилсан намын бүлэг өнөөдөр 10.00 цагаас эхлэн хуралдаж, Төрөөс мөнгөний бодлогын талаар 2011 онд баримтлах үндсэн чиглэл батлах тухай УИХ-ын тогтоолын төслийн эцсийн хэлэлцүүлгийг авч хэлэлцэх юм байна. Мөн Монгол Улсын 2011 оны Төсвийн тухай, Нийгмийн даатгалын сангийн 2011 оны төсвийн тухай, Хүний хөгжил сангийн 2011 оны төсвийн тухай хуулийн төслүүдийн талаарх бүлгийн санал дүгнэлтийг авч хэлэлцэнэ.

Нэгдсэн төсвийг Засгийн газар дахин өргөн барьснаар Мөнгөний бодлогод төсөөлсөнчлөн инфляцийг нэг оронтой тоонд барих боломжгүйд хүрээд буй. Төв банкны зүгээс “Дахин тодотгон оруулж ирсэн нэгдсэн төсөвт ирэх жилд инфляци 12-20 хувь хүрэх магадлалтай байна” гэж мэдэгдээд буй. Тиймээс бүлгээс  байгуулагдсан ажлын хэсгийнхэн Монгол Улсын 2011 оны нэгдсэн төсвийг хэрхэн Мөнгөний бодлоготой уялдуулах боломжтой байгаа талаар судалгаа хийснээ өнөөдөр танилцуулна.