Бямба гариг 06.30 цаг
Хоёр өдөр орсон цас хайлмагтан, замын зах хэсгээр хөлдсөн байв. “Цас орсноос хойш хоёр ч удаа давс, элс цацсан болохоор харьцангуй гайгүй байгаа болов уу” гэж Баянзүрх дүүргийн ТҮК-ний ажилтнууд хэлж байв. Зам талбайн ажилтан, жолооч ачигч нийт 50 хүний бүрэлдэхүүнтэй баг ажилдаа гарчээ. Өглөө -10 хэмийн хүйтэнд шар хантаазтангуудын амнаас уур савсаж, тэр дорхноо цантах аж. Тус дүүргийн хувьд Энхтайваны өргөн чөлөө, Хувьсгалчдын гудамж, Амарсанаа, Энэбиш, Чингүүнжавын гудамж зэрэг гол замууд харьяалагддаг аж. Нэг ачилтандаа 3-3,5 куб метр газар давс цацаж нийтдээ 20 тонн давс хальтиргаа гулгаанд зарцуулжээ. Харин Баянзүрх дүүргийн Тохижилт үйлчилгээний компанийн 32 ажилтан мөн л гурван өдөр уртасгасан цагаар ажилласан байна. Цас шүүрдэх, давс элс цацах зориулалттай дөрвөн машины хүчээр 10 тонн давс, 10 тонн элсийг Амгалан, Чулуун овоо, Арслантай гүүрээс Офицеруудын ордон зэрэг чиглэлийн замд цацсан гэв. Одоо тус компаний нөөцөд 80 тонн давс, 90 куб метр элс үлдсэн гэж байлаа.
Цас орсон сүүлийн өдөр буюу бямба гаригийн 18.00 цагийн үед Сонгинохайрхан дүүргийн Тохижилт үйлчилгээний компанийн баазын дарга Ж.Нямхүүтэй уулзаж, элс давс цацах ажлын явцын талаар ярилцсан юм.
-Өнгөрсөн хоёр өдөр цас орж замын хальтиргаа ихэслээ. Энэ нөхцөлд танай ажилтнууд хэрхэн ажиллаж байна?
-Бид өнгөрсөн сараас өвөлжилтийн бэлтгэл ажлаа хангаж, 90 гаруй тонн давс 30 орчим тонн элс нөөцөлсөн учир тэвдэж сандраагүй. Харин ажилтнууд маань гурван өдөр амралтгүй ажиллалаа. Өнгөрсөн өдрүүдэд 9,9 тонн давс, 10 куб метр элсийг Баянхошуу, нэгдүгээр хорооолол, Энхтайваны өргөн чөлөө зэрэг дүүргийн нутаг дэвсгэрт хамаарах бүхий л замд дээр цацаж хальтиргаа гулгаанаас сэргийлсэн. Одоо манай нөөцөд 87 тонн давс, 10 куб метр элс, 1 тонн химийн бодис үлдсэн. Дараа ахиухан хэмжээний цас орсон ч хүрэлцэх хэмжээний нөөц бий гэсэн үг.
-Хэдэн хүний бүрэлдэхүүнтэй ажиллаж байна?
-Манайх нийтдээ 90 гаруй ажилтантай. Энэ удаа зам, гудамжны ажилтан, жолооч, ачигч нийлсэн 36 хүн ажиллаж байна. Давс, элс цацахад олон хүн хэрэггүй учраас зарим нь замцын цасыг шүүрдэх ажлыг гүйцэтгэж байна. Өнөөдрийн байдлаар /бямба гариг/ 6000 метр квадрат талбай газрыг шүүрдсэн.
-Явган хүний зам орхигддог шүү дээ. Одоо ч гэсэн явган хүний замын цас хатуурсан харагдаж байна л даа ?
-Явган хүний зам дээр давс, элс цацах нь тохиромжтой биш. Гэхдээ манай ажилтнууд өөрсдийн харьяаны явган хүний замуудын цасыг цохиураар цохиж цэвэрлэнэ. Энэ удаагийн орсон цас тийм ч сүртэй хэмжээнийх биш. Ихээхэн хэмжээний цас орж, шуурахаар манай дүүрэгт хамаардаг даваанууд хаагддаг гэсэн юм.
Сүхбаатар дүүргийн
ТҮК өвөлжилтөд бэлтгээгүй байна
Төрийн байгууллага, томоохон үйлчилгээний газар, яам тамгын газрууд төвлөрсөн, замын хөдөлгөөний ачаалал ихтэй Сүхбаатар дүүргийн Тохижилт үйлчилгээний компани хальтиргааг хазаарлах элс давс, бодис аль алиныг нь нөөцлөөгүй аж. Учир нь энэ жил тус компанид дүүргийн Засаг даргын тамгын газраас хальтиргаанд хэрэглэх давс бодисны мөнгө төсөвлөөгүй аж. Тиймээс дүүргийн Засаг даргын тамгын газрын дэргэдэх Шуурхай албаныхан давс цацах ажлыг гүйцэтгэжээ. Цаашид цас ихээр орохоор байдал хүндрэх нь ойлгомжтой учир холбогдох газруудад давс, бодис нөөцлөх хүсэлт гаргаад байгаа гэнэ. Харин Сүхбаатарын талбайн цасыг тус компаний 10 гаруй ажилтан ээлжээр шүүрдэж байсан юм.
Энэ жил олон жилийн дундажаас ахиу цас унаж, хүйтрэх төлөвтэй байгааг судлаачид анхааруулж буй. Цаашид их хэмжээний цас орохоор зөвхөн элс, давс цацаад хүчрэхгүй нь ойлгомжтой. Тиймээс хурдан хугацаанд цас хайлуулах зориулалттай химийн бодисоо хүрэлцэхүйц хэмжээгээр нөөцлөх хэрэгтэй болно. Гэвч одоогоор ТҮК-ууд нийслэлийн Захирагчийн ажлын албанаас тендер зарлаж, урд хөршөөс орж ирэх химийн бодисыг л хүлээж байна.