Говь-Алтай аймгийн Алтай хотноо энэ сарын 25-27-ны өдрүүдэд “Их говийн тэмээний баяр-2010” наадам болно. Уг наадмыг Говь-Алтай аймгийн Засаг даргын тамгын газар, Хүнс хөдөө аж ахуй, жижиг, дунд үйлдвэрийн газар, Есөнбулаг сумын Засаг даргын тамгын газар, “Алтайн хөгжил XXI зуун” төрийн бус байгууллагаас хамтран зохион байгуулж байгаа аж. Тэмээн сүргийн үүлдэр угсааг сайжруулах, тоо толгойг өсгөхөд анхаарах, говийн малчдын туршлагыг солилцуулах, дотоод, гадаадын зочид, жуулчдын сонирхлыг тэмээнд суурилсан аялал жуулчлалд татах зорилготой гэдгийг зохион байгуулагчид онцолж байна. Наадамд сум тус бүрээс нэг баг оролцох бөгөөд энэ үеэр хурдан тэмээний уралдаан, Хурдан торомны уралдаан, шилмэл буур, ингэ шалгаруулах, сайхан тэмээтнй ганган хос, тэмээчдийн буухиа тэмцээн, тэмээний шилдэг сүүн бүтээгдэхүүн зэрэг олон уралдаан тэмцээнийг зохион байгуулах гэнэ.