Төсөв дөнгөж хоёр дахь даваагаа давахдаа л зардал нь ийн өслөө. Тэгэхээр яг батлах дээрээ тулахад айхтар зузаарч мэднэ. Ер нь энэ оны төсөв урьд өмнө байгаагүй нүсэр төсөв болж байна. Засгийн газар өнгөрсөн есдүгээр сарын 30-нд УИХ-д анх өргөн барихад улсын нэгдсэн төсвийн орлого гурван их наяд 56.8 тэрбум, нийт зарлага гурван их наяд 250.7 тэрбум төгрөг байхаар байв. Харин алдагдлын хэмжээ харьцангуй гайгүй буюу ДНБ-ий 2.5 хувьтай тэнцэж байсан юм. Гэтэл Засгийн газарт буцаасан биш, зарлага болоод алдагдлын хэмжээ хэт өсөөд буцаад ороод иржээ. Уг нь УИХ “Зардлаа тана, орлогоо тодорхой болго” гэсэн үүргийг Засгийн газарт өгсөн хэрнээ эсрэгээр ажиллаад байгаа нь ойлгомжгүй юм. Засгийн газар ч, УИХ ч ялгаа алга. Захиргааны зардлыг танамаар байна гэж бүгд ярьдаг хэрнээ өөрсдөдөө л мөнгө нэмээд байдаг. Өнөөдөр УИХ, Засгийн газрын ажиллах орчин нөхцөлийг хэн муу гэж голох юм бэ. Улсын нийгэм, эдийн засгийн байдал тогтворжоод хүн бүр боломжийн цалин, орлоготой болсон цагт төрийн түшээд тансаглаж болох л байх. Харин одоохондоо бол УИХ-д халамж хараахан хэрэггүй л болов уу. Үүнээс өөр яаралтай шийдэх ёстой эмзэг асуудал зөндөө олон бий шүү дээ. Том ордуудаас асар их хэмжээний мөнгө орж ирж, эдийн засагт үсрэлт гарна л гээд байгаа. Энэ онд эдийн засагт нааштай үр дүн гарч байгаа нь үнэн. Тодруулбал, энэ оны эхний хагаст ДНБ таван хувиар өсч, оны эцэс гэхэд 7.5 хувийн өсөлттэй байх урьдчилсан гүйцэтгэлтэй байгааг Монголбанкны ерөнхийлөгч хэлж байсан. Тэглээ гээд үүнд бардаж болох уу. Эдийн засагт өсөлт гарлаа ч иргэдийн амьжиргаанд барагтай бол нөлөөлөхгүй байгааг өнгөрсөн жилүүдийн түүх болон ядуурлын түвшин хэлээд өгнө. Яг үнэндээ төрийн ажил буруу эргээд байгааг бүгд л хүлээн зөвшөөрнө. Сонгуулийн амлалтдаа баригдаж ирэх жил иргэдийн гар дээр нийт 805.2 тэрбум төгрөг бэлнээр тараахаар болсон. Үүнийгээ тэд төр иргэдээ харж үзэж байгаа мэтээр ойлгуулж, тайлбарлаж байгаа. Гэвч бэлнээр тараах энэ их мөнгө сайнаасаа илүү саарыг дагуулах нь тодорхой. Дээр нь төсвийн алдагдал 8.6 хувьд хүрсэн, цаашид ч нэмэгдэх магадлалтай байгаа болохоор инфляцийн дарамт ирэх онд иргэдэд хүнд цохилт болно. Бэлэн мөнгө тараах тусам өргөн хэрэглээний бараа бүтээгдэхүүн, үйлчилгээний үнэ хяналтгүй өсдгийг өнгөрсөн хугацаанд бид хангалттай харсан. Гэтэл энэ алдаагаа ирэх онд дахиад л давтах нь. Төсвийн орлого олигтой нэмэгдэхгүй хэрнээ зарлага нь замбараагаа алдлаа.
Ч.ДАШДЭЛЭГ
"Улс төрийн тойм" сонин