УИХ-ын гишүүн, МАХН-ын түр штабын улс төрийн зохицуулагч Ц.Шинэбаяр:
-Би МАХН-ын гишүүн хэвээрээ байгаа. МАХН-ын нэрэн дор хэвээрээ байх хүсэлтэй олон гишүүн, дэмжигчид бий. Үүний нэг нь л би. Эхлээд МАХН нэрийг хэвээр үлдээхэд санал нэгдэж байгаа гишүүдээ бүртгээд дараа нь ямар гарц, шийдэл байгааг ярилцана. Шинэчлэлээс айж, хуучинтайгаа зууралдах хүсэлтэй хүн энд байхгүй. Өнгөрсөн их хурлаар XXV их хурлын биелэлтийг яагаад ярьсангүй вэ гэдэг асуудлыг хүмүүс их хэлж байна. Их хурлаар л гэхэд нам дамжсан улс төрийн бүлэглэлүүдийг намын дарга дэмжсэн шийдвэр гаргасан. Ийм байж болохгүй. Манай тойргийн сонгогчид хүртэл надад хэлж байна. Та МАХН-аас нэр дэвшсэн. Бид ч саналаа өгсөн. Тиймээс энэ намдаа хэвээр байх хэрэгтэй гэж байгаа. Намын өөрчлөлтийн талаар би эрс эсэргүүцэж байсан. МАХН-аа аврах нь бидний гол зорилго. УИХ-ын гишүүдийн хувьд надтай ижил бодолтой байх эсэх нь тэдний итгэл үнэмшлийн л асуудал. Би гишүүдэд санал тавьсан зүйл байхгүй. Гишүүд ч надтай уулзаагүй.
МАХН-ын түр штабын Олон нийт хариуцсан зохицуулагч Н.Удвал:
-Түр штаб байгуулж байгаатай холбогдуулан орон даяар санал авах утас ажиллуулсан. Одоогийн байдлаар нийслэлийн бүх дүүргээс 150 гаруй гишүүн саналаа ирүүлээд байгаа. Нийт 3000 орчим гишүүн, дэмжигчид бидэнд хандсан байгаа. Санал өгсөн гишүүдийн хэлж байгаагаар “Өнгөрсөн их хурлаар хариуцлагын тухай ямар ч асуудал ярьсангүй. Ардын нам гэдэг нэрийг авснаар иргэдийн дунд нэр хүндээ алдаж байна. Ардын нам гэчихээд нэг ч ард алга. Үүнийг их хурал болон Бага хурлын гишүүдээс харж болно. Намын шинэ байранд мөнгө хандивласнаас танай түр штабыг дэмжсэн нь дээр. Эцсийн найдвар та бүхэн шүү” гэж бидэнд итгэл үзүүлж байгаа.
МАХН-ын түр штабын Хөгжлийн бодлогын зохицуулагч С.Молор-Эрдэнэ:
-Монголд улс төр гэдэг зүйл өнөөдөр устсан. Улс төр өөрөө итгэл үнэмшил дээр тогтдог. МАХН гэдэг чинь Монгол орныг 80 жил авч явсан маш том нам. Тэр чигээрээ түүх. Ийм байж энэ нам гадаадын олигархиудын гар хөл болж жижгэрэх хэрэггүй. Томоохон улс төрийн хүчнийг эргээд байранд нь авчрахгүй бол Монгол улс төргүй болох нь. Тиймээс энэ намыг буцааж авчрах шаардлага бидэнд бий. Ардын намын 801 хүн өөр нам болоод галт тэргэндээ суугаад явчихсан. Тэд Ардын нам байгуулах хүсэлдээ хүрсэн. Дээд шүүх яагаад зөвшөөрснийг нь шалгах ч хэрэгтэй байх. Онц их хурлаараа бид намын дарга, Удирдах зөвлөлөө сонгоно. Үнэхээр анхны Ардын намыг сэргээсэн юм уу эсвэл Г.Баасан ламын намд дагаар ороод байгаа юм уу. Ойлгомжгүй, тодорхойгүй байгаад байна.
Ц.ЭНХЦЭЦЭГ
"Улс төрийн тойм" сонин