Шри Чинмойн үзэсгэлэн нээгджээ | News.MN

Шри Чинмойн үзэсгэлэн нээгджээ

Хуучирсан мэдээ: 2010.11.17-нд нийтлэгдсэн

Шри Чинмойн үзэсгэлэн нээгджээ

Нэрт зураач Шри Чинмойн “Жарна Кала” буюу “Оргилуур урлаг” сэдэвт уран зургийн үзэсгэлэн Дүрслэх урлагийн музейд нээгджээ. Үзэсгэлэнгийн нээлтийн ажиллагаанд Шри Чинмойн дотны анд доктор профессор С.Цэдэндамба болон Төрийн соёрхолт зураач С.Саранцацралт нар оролцсон юм. Улаанбаатар хот дахь Шри Чинмойн төвөөс зохион байгуулж байгаа уг үзэсгэлэнд Шри Чинмойн 80 гаруй бүтээлийг дэлгэн тавьжээ. Түүний зургуудын алагласан олон өнгө, хурдтай хөдөлгөөнтэй чанар нь хүний нүдний чилээг арилгах чанартай гэдэг. Шри Чинмойн бүтээлүүд нь хүүхэд насны баяр баясгаланг илэрхийлдэг.

Шри  Чинмой нь 200 мянга гаруй уран зураг, 16 сая сүнсэн шувуудыг зурсан байна. Тэрбээр уран зургийн бүтээлүүдээ эх ундаргаас ямагт оргилон гарч байхыг билэгдэж, бенгал хэлээрээ “Жарна Кала” буюу “Оргилуур урлаг” хэмээн нэрлэжээ. Түүний “Жарна Кала” үзэсгэлэн Нью-Йорк дахь НҮБ, Парис дахь ЮНЕСКО, Лондон дахь Молл Галерей зэрэг олон газруудад гарч байсан аж. Харин 2007 онд Монгол Улсын Ерөнхийлөгчийн урилгаар тэрбээр манай оронд айлчлах үеэрээ энэхүү үзэсгэлэнгээ Урчуудын эвлэлийн хорооны үзэсгэлэнгийн танхимд дэлгэн монголчуудын хүртээл болгож байжээ. Тэрбээр бүтээлээ хурц тод өнгөтэй акрилик будгаар далайн замаг, бийр, эсгий харандаа ашиглан зурахаас гадна зарим тохиолдолд хуруугаараа ч зурдаг байна.

С.Сүндэр

NewsMN Гар утасны хувилбар Татах
NEWS.mn

Мэдээллийн эх сурвалж