– Мэдээж тэгэлгүй яахав. Улаанбаатар хотын хамгийн их ачаалалтай төв замуудаар бага багтаамжийн автобусны чиг­лэлийн хөдөлгөөнийг хязгаар­лах нь Засгийн газар болон сал­барын яам, нийслэлээс гаргасан тодорхой шийдвэрүүдийг хэрэг­жүүлэх ажлын хүрээнд хийгдэж байгаа. Энэ оны зургадугаар са­рын 26-наас эхлэн баруун чиг­лэлүүдэд болон 3,4-р хорооллын гол замуудад нийтийн тээврийн бага багтаамжийн автобусны хөдөлгөөний хязгаарлалтыг хийсэн. Иргэд олон нийтийн зү­гээс ч гэсэн ихээхэн дэмжлэг ав­сан. Одоо бол чиглэл маршрутаа баримталж хэвшээд байна. Мэр­гэжлийн байгууллагууд зохих бэлтгэл ажлуудыг хийсний үнд­сэн дээр зүүн чиглэлд мөн хяз­гаарлалтыг энэ сарын 10-наас эхэлсэн. Зүүн дөрвөн замаас Офицеруудын ордны хооронд 15 чиглэлийн их багтаамжийн 154 автобус, троллейбус, 10 чиглэлийн бага багтаамжийн 214 автобус тус тус зорчиж бай­на. Хязгаарлалт хийгдсэнээр шугамын давхцал 55.0 хувиар, автобусны тоо 71.8 хувиар тус тус буурахаар тооцоо гарсан.

-Гэхдээ бага багтаамжийн автобусны чиглэлийг хязгаарлах ажил өмнө нь хийгдэж байсан биз дээ?

-Тийм ээ. Бага оврын ав­тобус­ны чиглэлийн хөдөлгөө­нийг  тодорхой гудамж замуудад хязгаарлах ажил аль эрт 2000 оноос хойш  хийгдэж байгаа бө­гөөд Зүүн дөрвөн замаас Офи­церуудын ордны хооронд бага багтаамжийн автобусны чиг­лэлийн хөдөлгөөнийг хязгаар­лаж байгаа нь энэ ажлын үргэлж­лэл юм. Ийнхүү хязгаарлалт хийхдээ бага багтаамжийн ав­тобусны туслах болон буухиа чиглэлийн  жолооч кондук­торуу­дыг ажлын байргүй болгосон хэрэг биш. Зөвхөн чиглэл марш­рутанд өөрчлөлт оруулсан. Ний­тийн тээврийн үйлчилгээнд “Туслах” чиглэл бол батлагдсан маршрутын дагуу явдаг. Харин  “Буухиа чиглэл” гэдэг бол нийс­лэл хотын 24 цэгээс зорчигчдоо суулгаад Нарантуул зах руу шууд хүрдэг үйлчилгээ юм. Эдгээрээс буухиа үйлчилгээний найман  аж ахуйн нэгж төв замаар явахгүй хязгаарлалтанд хамрагдсан. Тэр дотроо “ Аж мянган”, “Эм Бэ Эм Эм”, “22-р бааз” гэсэн гурван аж ахуйн нэгжийн 67 тээврийн хэрэгслийн асуудал яригдаж байна. Энэ компаниуд бол Шар­хад, Цайз, Эрдэнэтолгой зэрэг эцсийн буудлуудаас зах руу тээ­вэрлэдэг бөгөөд шинэчилсэн маршрутаар бол зах руу орох болон гарахдаа Намьянжугийн гудамжаар яваад Туул Жинпан­гаар баруун эргэж Цайз захын замаар явах чиглэлийг тогтоож өгсөн.  Харин зүүн чиглэлүүдээс ирж байгаа Хужирбулан, Улиас­тай, Налайх, Жанжин клуб зэрэг чиглэлийн бага багтаамжийн автобуснууд нь Чулуун овоогоор орж Нарны замаар явж зах руу орно. Буцахдаа мөн адил Нарантуулын төв хаалгаар гарч зүүн эргээд Нарны замаараа буцах нь ямар ч асуудалгүй. 

-Яагаад жолооч нар ингэж их эсэргүүцэл илэрхийлээд байгаа хэрэг вэ?

-Дээр хэлсэн эдгээр буухиа болон туслах чиглэлийн зарим жолооч нар ажил хаялт суулт зарлаж эсэргүүцлээ илэрхийлж байгаа. Тэд бол зөвхөн өөрс­дийн эрх ашгийг л илэрхийлж байна. Гол нь шинэ маршрутаар явахгүй, орлого буурна, төв за­маараа явна л гэсэн шаардлагыг тавьж байна. Нийслэлийн төр захиргааны шийдвэр болон Нийтийн тээврийн газрын зохи­цуулалт бол иргэд зорчигчдыг хохироохгүй байхаар, нөгөө та­лаас бага багтаамжийн автобус­ны жолооч нарын эрх ашгийг хохироолгүй, зөвхөн чиглэл марш­рут өөрчилсөн байгаа. Офицеруудын ордон, Цэргийн төв эмнэлэг, Кино үйлдвэр, Жуковын музейн буудлуудаас Нарантуул зах ордог иргэдийн хувьд унаагүйдсэн асуудал байхгүй. Энэ замаар яваад Нарантуулын орчимд зогсдог их багтаамжийн автобусны чиглэл байгаа. Үнэхээр ачаалал нэмэг­дээд ирвэл автобусны тоог нэмэгдүүлж болно. Мөн зүүн чиглэл Улиастай, Хужирбулан­гаас орж ирж төв зам дагуу буудаг иргэдийн хувьд ч гэсэн шаардлага гарвал их багтаам­жийн автобусных нь тоог нэмэг­дүүлэх боломжтой. 

-Иргэд энэ талаар эсэргүүцэхгүй харин ч дэмжиж байх шиг харагдаж байна. Та бүхэнд иргэд энэ талаар гомдоллож байна уу?

-Үгүй. Харин тэд их сайн дэм­жиж байгаа шүү. Манай газрын санал хүсэлт авдаг 32-31-76, 32-63-52 утаснууд руу залгаж сана­лаа хэлж байна.  Янз бүрийн ажил эрхэлдэг болон ахмад наст­нууд нийслэл хөгжих ёстой гэж үздэг  иргэд ч холбогдож саналаа илэрхийлж байна. Мөн манай вэб хуудас болон  inet.mn  мэ­дээл­лийн сайтаар өнгөрсөн сард явуулсан санал асуулгын дүн ч гэсэн дэмжиж байгаа үнэл­гээ 85-90 хувьтай гарсан.   Цаа­шид бид бүхий л сувгаар ир­гэдийнхээ, зорчигчдынхоо мөн хөдөлгөөнд байнга оролцож байгаа жолооч нарын үнэлгээ дүгнэлт, санал хүсэлтийг хүлээн авч ажилдаа тусган хэрэгжүүлэх болно. Хотын хөгжил, иргэн та­ны зорчих эрэлт хэрэгцээг хан­гахын төлөө зорчигчийн санал гэдэг хамгаас чухал байдаг юм.