Монголын шилдэг уран бүтээлчдийн баг ОХУ, Казахстанд улсынхаа урлаг, соёлыг сурталчлахаар маргааш хилийн дээс алхах гэж байна. ОХУ, Казахстанд зохион байгуулах Монголын соёлын өдрүүд энэ сарын 11-17-ны өдрүүдэд үргэлжлэх гэнэ.
Москвагийн “Большой театр”-т зочилж, уран бүтээлийн тайлангаа тавих энэ удаагийн бүрэлдэхүүнд ДБЭТ-ын гоцлол дуучин, Гавьяат жүжигчин С.Мөнгөнцэцэг, гавьяат жүжигчин, Монголын шилдэг балетчин Д.Алтанхуяг, “Харанга”-ын Лхагваа, поп хатагтай Б.Сарантуяа, дуучин С.Наран, гитарчин Өөжгий гэхчлэн манай урлагийн жинхэнэ сор болсон уран бүтээлчид багтжээ. Эдэн дээр Морин хуурын чуулга, ҮДБЭЧ-ын бүжигчид гэсэн багийн бүрэлдэхүүнийг нэмээд 100 гаруй уран бүтээлч хойд хөршид урлагаа сурталчлах томилолт өвөртлөөд байгаа аж. “Onn&Off” продакшны захирал С.Ононбат найруулж байгаа Монголын соёлын өдрүүдийн хүрээнд Алма-Ата, Москва хотноо найруулагч Б.Баатарын “Татар ажиллагаа”, Ж.Сэнгэдоржийн “Адам буюу хүчилтөрөгч”, Б.Жаргалсайханы “Дэв”, Ц.Ганбатын “Миний муу аав” киног гадаадын үзэгчдэд мөн толилуулах юм билээ.