Жил бүр уламжлал болон зохиогддог Нью–Йоркийн марафон гүйлтэд нэрээ хамгийн сүүлд бүртгүүлсэн оролцогч
сюрприз болж байна. Чилид
болсон уурхайн нурангинаас амьд гарсан уурхайчдын нэг Эдисон Пена уг уралдаанд
оролцохоор болжээ.

Пенагийн хувьд 69
хоногийн турш нурангин дор байсан 33 залуугийн нэг юм. 41 дэх удаагаа зохиогдох
гэж байгаа, дэлхийн хамгийн томоохон марафоны нэгд түүнийг үзэх урилга өгсөн ч уурхайчин залуу маань оролцохыг хүсч, уралдааны дугаар авчээ.

Тэрбээр Копиапо
уурхайд 700 метрийн гүнд дарагдан, гүнд байх үедээ 1 км замыг харанхуйд гүйж туулдаг байжээ. Тэр үед ажлын гутлынхаа түрийг тайрч, хөлдөө эвтэйхэн болгосон байсан
аж. Энэ мэдээг сонссон марафоны
зохион байгуулах хороо шуурхай ажиллаж түүнийг урьсан байна. Эдисон Пена ням гаригт болох уралдаанд маш идэвхтэй бэлдэж байгаа
бөгөөд энэ удаад түүнд ажлын гутал бус хөнгөн атлетикийн шаахай хэрэгтэй.