Спортын төв ордонд аравдугаар сарын 23-нд эхэлсэн Монголын Волейболын холбооны 16 дахь удаагийн үндэсний лигийн аварга шалгаруулах тэмцээний хоёрдугаар тойргийн сүүлийн тоглолтууд өчигдөр болж өнгөрлөө. Өчигдөр эрэгтэйчүүдийн хоёр тоглолт болсноос ИНЕГ-ын “Буянт-Ухаа” баг 3:1 харьцаатай “Харх” багийг хожсон бол “Ноён” 3:2-оор “Эрчим” багийг буулган авчээ. Ингэснээр лигийн хоёр тойргийн дараах байдлаар “Эрчим” болон “Буянт-Ухаа” багууд ижил гурван оноотой тэргүүлж байна.
Харин эмэгтэйчүүдийн тухайд “Аминбүрд Энагура” баг тэргүүлж байгаа бол “Эрчим”-ийн бүсгүйчүүд хоёрдугаарт бичигдээд байгаа юм.
Манай волейболчид энэ сарын 12-27-ны өдрүүдэд БНХАУ-ын Гуанжоу хотноо болох Азийн XVI спортын их наадамд оролцох бөгөөд дараа нь БНСУ-ын Чежүд болох Зүүн Азийн волейболын аварга шалгаруулах тэмцээнд оролцох учир лигийн тэмцээнийг түр завсарлуулж байгаа юм.
Волейболын үндэсний лигийн аварга шалгаруулах тэмцээн 2011 оны нэгдүгээр сарын 5-16-ны өдрүүдэд үргэлжлэн явагдана.
С.Цэлмэг