Дэлхийн банкны мэдээгээр БНХАУ-ын эдийн засгийн хөгжлийн төлөв сайн, одоо бүтцийн асуудалд анхаарч эхэлжээ гэж Монгол дахь төлөөлөгчийн газраас мэдээллээ. Дэлхийн банкны Монгол дахь суурин төлөөлөгчийн газар ээлжит видео уулзалт боллоо. Энэ удаа тус банкны Бээжин дэх мэргэжилтнүүдтэй Монголын хэвлэлийнхэн видеогоор “уулзсан” юм. Видео уулзалтын гол сэдэв дэлхийн даяар анхаарал татаад байгаа БНХАУ-ын эдийн засгийн байдлын талаар байв. Энд мөн ханшийн дайн гэсэн нэр хүртэл аваад юанийн ханшийн асуудал хөндөгдөв. Дэлхийн банкны гаргасан Хятадын эдийн засгийн талаарх улирлын тоймд эдийн засгийнх өсөлт хэмжээгээр аядуу болж ирсэн ч хурдац нь эрүүл хэвээр байж, бүтцийн тодорхой өөрчлөлт орж байгаа гэжээ.
Хятадын эдийн засгийн өсөлт дэлхийн хөрөнгийн биржүүдийг донсолгож, олон улсын гадаад худалдаанд голлох үүрэг гүйцэтгэж байгаа. Гэхдээ энэхүү өсөлт инфляцийн аюул дагуулж байгаа тул Засгийн газраас нь арга хэмжээ авч эхэлжээ. Дэлхийн банкны Бээжин дэх төлөөлөгчдийн мэдээлснээр Хятад эдийн засгийнхаа өсөлтийн загварыг өөрчлөхөөр оролдож байгаа аж. Тэд гадаад худалдааныхаа тэнцвэрийг хангахын тулд импортыг дэмжсэн бодлого боловсруулж байгаа. Мөн дотоод зах зээл рүү илүү чиглэсэн, үйлчилгээний салбарыг дэмжих болон байгаль орчны бодлого зэрэгт илүү анхаарах болж байна. Ингэснээр одоогийн эдийн засгийн гол хөдөлгүүр болох аж үйлдвэрлэлийг түлхүү анхаарах бус, импортыг нэмэгдүүлэх боломжтой болж байгаа юм. Түүнчлэн төв банк асар их хэмжээний зээл олгоод байгаа. Орон нутгийн зүгээс он жилүүдийн турш хуримтлагдсан өрөө хэрхэн барагдуулах нь асуудал болжээ. Тиймээс Хятадын Ардын банк зээл олголтыг хязгаарлаж эхэлж байгаа юм.
Хэдийгээр аж үйлдвэрлэл буурснаар түүхий эдийн хэрэглээг багасгах ч Засгийн газар дэд бүцийн салбарт асар их хөрөнгө оруулалт хийж байгаа нь зэс, хөнгөн цагааны хэрэглээг нэмэгдүүлж байгаа. БНХАУ дунд бага орлоготой өрхүүдэд зориулсан орон сууцны төсөл хэрэгжүүлэх болоод байгаа. Тэгэхээр ашигт малтмалаар баялаг Монгол зэрэг оронд таатай нөхцөл бүрдэх төлөв харагдаж байгаа юм. Дэлхийн банкны төлөөлөгчдийн хэлж буйгаар аж үйлдвэрийн салбарт хамгийн их хэрэглэгддэг металл болох зэсийг урд хөрш их хэмжээгээр худалдан авах юм. Зэс Монголын хувьд “хөзрийн тамга”.
Хэдийгээр тодорхой хэмжээний бууралт гарах төлөвтэй байгаа ч гэсэн шинээр хөгжиж буй зах зээлийн байдал бэхжиж байгаатай уялдан дэлхийн хэмжээнд өсөлт цаашид харьцангуй таатай байх бололтой байна. Гэхдээ, эрсдэл сүүтэгнэсэн хэвээр. Өндөр орлоготой орнуудын төлөв тааруухан, олон орон гадаад худалдааны илүүдэлтэй байгаа нь дэлхийн хэмжээнд үнийн дарамт үзүүлсээр байх төлөвтэй байна. Харин түүхий эдийн үнэ дахин өсч байгаа учир олон улсын хэмжээнд инфляци өсөх эрсдэлтэй байна.
Хятадын эдийн засгийн хувьд эрсдэл хоёр талдаа байгаа ч хэтийн төлөв сайн байна гэж энэхүү тоймд цохон тэмдэглэсэн байна. Тус тоймын гол автор, ахлах эдийн засагч Люис Күйжс Хятадын эдийн засгийн өсөлт ирэх жил 8,7 хувь хүртэл буурах ч энэ нь муу үзүүлэлт биш гэв. Хүнсний бүтээгдэхүүний үнэ өндөр байгаагаас инфляци хэсэгтээ л гурван хувиас өндөр байх бололтой. Дэлхийн банк Хятадын Засгийн газрыг инфляцийн цөмийг хяналтад байлгах учраас инфляци цаашид даамжрахгүй гэж тооцоолж байна.
“Макро төвшинд эрсдлээс сэрэмжлэн, улам тогтворжуулан хэвийн болгох шаардлагатай байна” гэж Хятадын эдийн засгийг судлагч, тэргүүлэх эдийн засагч Ардо Ханссон хэлэв. “Гол санаа тавих асуудал нь хөрөнгийн үнэ, орон нутгийн санхүүгийн ачаалал болон чанаргүй зээлийн хэмжээ өсөн нэмэгдэж байхын зэрэгцээ инфляцийн эрсдэлийг үгүйсгэх аргагүй юм. Хамгийн гол нь хоёр урсгалт эрсдэл нь уян хатан бодлогыг шаардаж байна” гэж тэрбээр тодотгож байгаа юм.
Улирлын тойм нь хувийн хэвшлийн хөгжлийг хангахтай холбогдсон бодлогын асуудлыг бас авч үзэж байгаа бөгөөд салбарын хөгжих боломжийг нээх, хувийн аж ахуй эрхлэж эхлэхэд тохиолдох саад бэрхшээлийг багасгах, хөрөнгө оруулалтын орчинд байгаа сөрөг байдлыг арилгах, хувийн хэвшлийн судалгаа, хөгжил болон шинэтгэлийн ажлыг нь дэмжихэд анхаарал төвлөрүүлэх асуудлыг мөн авч үзэж байна. Эрчим хүчний хэмнэлт, сэргээгдэх эрчим хүчний чиглэлээр дэвшил гаргая гэвэл өсөлтийн хэлбэрийг эргэн харах шаардлага гарч байгаа бөгөөд түүнчилэн эрчим хүчний үнэ тарифын шинэчлэл хийх, илүү зах зээлийн харилцаанд тулгуурласан механизмтэй болох, эрчим хүчний шинэ технологийн хөгжүүлэх асуудлыг эрчимжүүлэх шаардлагатай байна.
Харин Хятадын юанийн ханшийн нөлөө дэлхийн зах зээл, ашигт малтмалын үнэд нөлөөлөх эсэх асуултад Дэлхийн банкны зүгээс эсрэг хариулт өгч байна. “Их-20”-ийн гишүүн орнууд энэ асуудал дээр илүү анхаарч ажиллаж байгаа төдийгүй, “ханшийн дайн”-аас сэргийлэх, уян хатан харилцааг хангахаар ажиллаж байгаа гэв. Юанийн ханш ам.долларын эсрэг “огцом, хэт ихээр” өсвөл газрын тос, зэс зэрэг бүтээгдэхүүний үнэд өөрчлөлт оруулж болзошгүй ч ийм магадлал бага байгаа. Харин хэрэгцээ, хангамжийн асуудал гол зүйл болох хөрөнгийн зах зээл дэх бараа бүтээгдэхүүний үнэд төдийлөн нөлөөлөхгүй төлөв харагдаж байгаа аж.
Хятадын эдийн засгийн тоймоос…
Хятадын ДНБ-ний өсөлт 2010 оны эхний хагас жилд 10.6 хувь байснаа гуравдугаар улиралд 9.6 хувь болж буурсан ч өсөлт хүчтэй хэвээр байна. Төсвийн хүрээнд эдийн засгийг дэмжих хөтөлбөр багасч байгаатай уялдан дотоодын эдийн засгийн халалт буурч, мөнгөний байдал хэвийн болж байна. Хөрөнгө оруулалт, хотын хэрэглээ болон импортын өсөлт буурч эхлээд байна. Энэ хугацаанд экспорт хүчтэй хэвээр байж, цэвэр гадаад худалдаа өсөлтөнд хүчтэй нөлөөлж, гадаад худалдааны ашиг дахин өсч ирлээ.