УИХ-ын гишүүн Л.Гүндалайд хувийнхаа “пиар”-ыг хэний ч оролцоогүйгээр, хэнээс ч илүү хийж чаддаг нэг давуу тал бий. 2004 УИХ-д хоёр дахиа сонгогдсоных нь дараа АНУ-ын Ерөнхийлөгчийн сонгуулийн компанид ажиллаж байсан баг ирж манайханд “пиар” технологи заахад Л.Гүндалай гишүүн ганцаараа яваад оччихсон “Тэгвэл яах уу, ингэвэл яах уу” хэмээн байцааж, хэлсэн үг бүрийг нь бичиж тэмдэглэн хамгийн идэвхитэй сурагч нь болж, ангийнхнаараа алга ташуулж байсан удаатай.

Түүнтэй хамт Хөвсгөлийн тойргоос сонгогдсон Ц.Даваасүрэн гишүүн нэг удаа аймгийн төв дээр сонгогчидтойгоо уулзалт хийгээд явж байжээ. Уулзалтаа дуусгаад гартал үүдэн дээр Л.Гүндалай гишүүнтэй тааралдаж гэнэ. Тэгээд,

–Чи ч гэсэн иргэдтэй уулзахгүй юм уу, хүмүүс бэлэн цуглачихсан байна гэхэд,

-Яах юм. Тантай л уулзаж, танд алга таших гэж ирсэн хүмүүс шүү дээ гээд яваад өгчээ.
Харин цааш хэд алхаад сагсны талбай дээр бөмбөг цохиж байсан хэдэн хөвгүүдтэй тааралдаад 5000 төгрөгөөр мөрий тавин  бөмбөг шидэж, мөрийгөө алчихаад инээд алдан дал мөрийг нь цохичихоод яваад өгөхөд залуус бөөн баяр болж, түүний хойноос бишэрсэн харцаар үлдэж. Үүнийг харсан Ц.Даваасүрэн гишүүн ч “Нээрээ ингэж их цаг, хүч зарж, уулзалт ярилцлага хийхийн хэрэг байна уу. Сагс сайн тоглодог байсан ч болоосой” хэмээн ихэд харамссан гэнэ.