Германы Кёльн хотын KSV AE Kollerbach клубтэй гэрээ байгуулсны дагуу Германы бөхийн чөлөөт барилдааны Бундеслигт зодоглож буй Монгол Улсын Гавьяат тамирчин Б.Наранбаатар өнгөрөгч амралтын өдрүүдэд лигийн хоёр болон гуравдугаар тойргийн барилдаанаа хийжээ. Хөлбөмбөгийн лигтэй адил долоо хоногт нэг л барилдаан хийх ёстой боловч бямба, ням гаригт манай тамирчин дараалан барилдаж, ялалт авсан байна.

Эхний тойргийн барилдаандаа буюу өмнөх долоо хоногт тэрбээр дэлхийн аваргын мөнгөн медальт, Европын хошой аварга, Молдавын Генади Тулбитай таван үе барилдаж, ялалт байгуулсан бол өнгөрсөн бямба гаригт болсон хоёрдугаар тойргийн барилдаанд Болгарын бөхийг, гуравдугаар тойрогтоо Ираны бөхийг гурван үе дараалан илт давуу ялжээ.

Дашрамд сануулахад, Германы Бундеслигийн барилдаанууд таван үе үргэлжилдэг онцлогтой бөгөөд гурван үед давуу байсан нь ялалт байгуулдаг дүрэмтэй учир тамирчнаас өндөр ур чадвар, техник шаарддаг байна. Б.Наранбаатар Бундеслигт нийт есөн долоо хоног барилдах бөгөөд дараагийн барилдаанаа ирэх бямба гаригт хийнэ.