Улсын ерөнхий прокурорын орлогчид Ерөнхийлөгчийн зүгээс Ц.Бямбацогтыг мэдүүлсэн билээ. Тэрбээр МУИС-аас гадна ЗХУ-д хуульчийн мэргэжил эзэмшсэн нэгэн. Прокурорын байгууллагын удирдах албан тушаалтнуудын олонхи нь насаараа нэг газарт ажилласан намтартай бол Ц.Бямбацогт хуулийн зөвлөхөөс албан тушаал ахижээ. Тодруулбал, Шүүх яамны хууль боловсруулах хэлтэст мэргэжилтэн, Олон улсын геологийн экспедицийн хуулийн зөвлөх, Геологийн яаманд хуулийн зөвлөхөөр ажиллаж байсан үе түүнд бий. Ц.Бямбацогт Сүхбаатар дүүргийн прокурорын газарт ажилласнаар прокурорын байгууллагатай амьдралаа холбожээ. Тэрбээр Сүхбаатар, Баянгол дүүргийн прокуророос Улсын ерөнхий прокурорын газарт хяналтын прокуророор ажиллаж байлаа. Улсын бүртгэлийн 13 ажилтан албан тушаалаа ашиглан хуурамч бичиг баримт бүрдүүлсэн дуулиан ид өрнөж байх үед түүнийг Иргэний бүртгэл мэдээллийн улсын төвд Хяналт шалгалтын хэлтсийн даргаар томилсон. Ц.Бямбацогт даргыг ажлаа авснаас хойш хуурамч иргэний үнэмлэх, ажилтнуудынх нь ашиг хөөсөн үйлдэл харьцангуй багассан гэдэг. Иргэний бүртгэлийн улсын төвийн сүлжээний мэргэжилтэн олон тооны гадаад паспорт хуурамчаар хийсэн үйлдлийг Ц.Бямбацогт илрүүлж шалгуулсан гэх яриа ч байдаг. Үүнээс хойш түүнийг иргэний бүртгэлийн “цэвэрлэгч” гэж нэрлэсэн аж. Иргэний бүртгэлийн ерөнхий газар нэрээ солих үед түүнийг орлогч даргаар томилсон. Харин жилийн дараа Улсын ерөнхий прокурорын орлогч болгохоор зүтгүүлж байна. Иргэний бүртгэлийн “цэвэрлэгч” прокурорын байгууллагад бугшсан хууль бус үйлдэл, танил талын сүлжээг цэвэрлэж шинэчилнэ гэдэгт Ерөнхийлөгч найджээ.