Төсвийн байнгын хорооны өнөөдрийн хуралдаанаар Засгийн газрын тусгай сангийн тухай хуульд нэмэлт оруулах тухай хуулийн төслийг хэлэлцэх эсэхийг шийдлээ. Уг хуулийн төслөөр хүч хэрэглэсэн гэмт хэргийн улмаас хохирсон хохирогчдод нөхөн төлбөр ногдуулах харилцааг зохицуулах аж. “Хүч хэрэглэсэн” гэх гэмт хэрэгт нийт 12 төрлийн гэмт хэргийг хамааруулсан бөгөөд хэрэг үйлдсэн этгээд хохирогчид учруулсан хохирлыг төлж чадахгүй тохиолдолд төрийн тусгай сангаас нөхөн олговор олгож, дараа нь уг нөхөн төлбөрийн мөнгийг гэм буруутай этгээдээс гаргуулан авахаар заажээ.

Мөн олгож болох мөнгөний хэмжээг тогтоож хохирогч амь насаа алдсан тохиолдолд ар гэрийнхэнд нь Хөдөлмөрийн хөлсний доод хэмжээг 30 дахин нэмэгдүүлсэнтэй тэнцэх хэмжээний нөхөн олговор, хөдөлмөрийн чадвараа алдсан бол 20 дахин нэмэгдүүлсэнтэй тэнцэх хэмжээний нөхөн олговрыг олгохоор заасан байна.
Харин энэхүү хуулийн төсөл энэ хэвээрээ батлагдвал Үндсэн хуультай ямар нэг байдлаар зөрчилдөх вий гэх болгоомжлолтой байгаагаа гишүүд Байнгын хорооны хуралдаан дээр хэлж байлаа.

Монгол улсын Үндсэн хуульд хууль шүүхийн өмнө хэнийг ч ялгаварлан гадуурхахгүй байхаар заасан байтал тодорхой 12 төрлийн гэмт хэрэгт хохирсон иргэдэд нөхөн олговор олгох нь Үндсэн хуультайгаа зөрчилдөх юм биш үү хэмээн анхаарууллаа. Эцэст нь уг хуулийн төслийг хэлэлцээд УИХ-аар хэлэлцэх нь зүйтэй хэмээн шийдвэрлэсэн байна.

Б.Мандах