УИХ-ын Хууль зүйн байнгын хорооны өнөөдрийн хуралдаанаар Улсын ерөнхий прокурорын орлогчид нэр дэвшээд буй Ц.Бямбацогтыг томилох тухай асуудлыг зөвшилцөх  юм.  Энэ албыг өмнө нь Б.Цэрэнбалтав хашиж байсан ч тэрбээр чөлөөлөгдөх хүсэлтээ гаргасны дагуу орны хүнийг томилох шаардлагатай болж, Ерөнхийлөгч хуулиар олгогдсон бүрэн эрхийнхээ дагуу энэ сарын 14-нд Ц.Бямбацогтыг Улсын ерөнхий прокурорын орлогчид нэр дэвшүүлэх хүсэлтээ УИХ-ын даргад мэдүүлсэн юм.

Ц.Бямбацогт нь 1958 онд Улаанбаатар хотод төрсөн, 52 настай, эхнэр хүүхдийн хамт амьдардаг.  Хуучнаар ЗХУ-ын Ташкентын Их сургууль, МУИС-ийг тус тус төгссөн. Хууль зүйн магистр зэрэгтэй. Мөн Шүүх яамны хууль боловсруулах системчлэх хэлтэст мэргэжилтэн, Олон улсын геологийн экспедицийн хуулийн зөвлөх, бүрэн эрхт төлөөлөгчдийн нарийн бичгийн дарга, Геологийн яаманд хуулийн хэлтсийн зөвлөх, Сүхбаатар дүүргийн прокурорын газарт хяналтын прокурор, Улаанбаатар хотын прокурорын газарт хяналтын прокурор, Баянгол дүүрэгт ахлах прокурор, Улсын ерөнхий прокурорын газарт хяналтын прокурор, Иргэний бүртгэл мэдээллийн улсын төвд хяналт шалгалтын хэлтсийн дарга зэрэг албуудыг хашиж байгаад 2009 оноос Улсын бүртгэлийн ерөнхий газрын орлогч даргаар ажиллаж буй юм.