Сонгодог аялгууг орчин үеийн хөг aйзам, хэмнэл донжтой төгс зохируулсан поп опера урсгалаар уран бүтээлээ туурвидаг болсоор багагүй хугацааг үдэж байгаа нэгэн хамтлаг бол “Нюанс” хамтлаг юм. Хөгжмийн ертөнцөд улам бүр хүчээ авч, мянга мянган залууст сонгодог урлагийг ойртуулж байгаа энэ хамтлаг попера урсгалаар тодотголыг хийж явдаг. Эргэлт буцалтгүй сонгосон энэхүү урсгалын яруу сайхныг  Монголынхоо үзэгчдэд улам бүр мэдрүүлэн сонгодог урлагийн өндөр хэмжүүрт нийцсэн  сайхан бүтээлүүдийг туурвихаар тэд шамдаж байгаа ажээ. Улсын дуурь бүжгийн эрдмийн театрын тайзнаа “Nuans popera concert ”, “Isabel”, “Amore”, “Angelina” зэрэг popera  тоглолтуудыг амжилттай тоглож үзэгчдээс өндөр үнэлэлт авсан “Нюанс” хамтлагийнхан энэ удаад хөдөө орон нутгийг зорих гэж байна. Тэд  “Angelina” pop-opera тоглолтоо хөдөөгийн фенүүддээ толилуулахаар бэлтгэл ажилдаа оржээ. Тус хамтлагийнхан арваннэгдүгээр сарын 3-23-ны өдрүүдэд аялан тоглолт хийх гэнэ. Ньюсынхан Баянхонгор, Өвөрхангай, Хорхорин, Архангай, Булган, Эрдэнэт, Хөтөл, Дархан, Сэлэнгэ, Зүүнхараа, Увс, Ховд, Баян- Өлгий зэрэг аймгуудын үзэгчдэдээ уран бүтээлээ толилуулна. Нюанс хамтлагийн хөдөө орон нутагт тоглох тоглолтын ерөнхий ивээн тэтгэгчээр Хаан банк ажиллаж, мэдээллийн ивээн тэтгэгчээр ТВ 5, ТВ 9 телевиз мөн AeroMongolia,  Total music, Мөнхийн үсэг ХХК, Магнай трейд, Бөртэ ТӨҮГ зэрэг газрууд ажиллаж буй юм байна.