УИХ-ын чуулганы үдээс хойшхи хуралдаанаар Иргэний эрүүл мэндийн даатгалын тухай хуулийн төслийг авч хэлэлцэж байна. Хуулийн төсөлд зааснаар иргэдийг заавалд бүгдийг хамруулна гэж заагаад байгаа юм. Мөн хэсэг бүлэг хүн өөрсдөө хүсвэл нэмэлт даатгалд хамрагдаж болно. Нэмэлт даатгалыг хувийн даатгалын компаниуд хэрэгжүүлээд явах бололцоотой бол заавал даатгалыг Засгийн газрын хэрэгжүүлэгч агентлаг хамаарна. Үүнтэй холбоотойгоор 200 орчим хүний орон тоог шинээр нэмж, дахин агентлаг байгуулах болж байгаа аж. Үүнд гишүүд шүүмжлэлтэй хандлаа. Татварын байцаагч, нийгмийн даатгалын байцаагч гэж байхад дахиад бас нэг эрүүл мэндийн даатгалын байцаагч гаргаж ирэх нь нүсэр багийг бий болгох нь. Татварын байцаагч нь Эрүүл мэндийн даатгалын шимтгэлээ мөн татвараа, нийгмийн даатгалын шимтгэлээ хураагаад, сан сан руу нь хуваарилчихдаг болбол ямар вэ гэж үзэж буй юм. Тиймээс хуулийн төслийг УИХ-ын Нийгмийн бодлого боловсрол, соёл шинжлэх ухааны байнгын хороогоор авч хэлэлцэх үед дээрх асуудлыг хөндсөн талаар УИХ-ын гишүүн Д.Одбаяраас лавлалаа. Тэрбээр “Байнгын хороогоор хуулийн төслийг хэлэлцэх шатанд энэ асуудлыг  ярьсан.  Харьяалах яамны сайд нь гишүүдийн хэлснээр ганц байцаагчтай байж болно” гэж байр сууриа хэлсэн. Гэхдээ дан ганц эрүүл мэндийн даатгалын шимтгэлийг хурааж авах зорилготойгоор 200 хүнтэй агентлаг ч бас байгуулах гээд байгаа юм биш гэлээ. 

Иргэний эрүүл мэндийн даатгалын тухай хуулийн төсөлд зааснаар иргэн эмнэлгийн үйлчилгээ авах бол даатгалаас нь эхлээд 60 хувийг тухайн эмнэлэгт шилжүүлнэ. Эмчилгээ, үйлчилгээ авч дууссаны дараа үлдсэн 40 хувийг шилжүүлэхээр заажээ. Энэ нөхцөлд эрүүл мэндийн үйлчилгээ сайжирна гэж үзэж байгаа аж. 

Мөн энэхүү хуулийн төсөлтэй холбогдуулж, УИХ-ын гишүүн Л.Гүндалай байр сууриа илэрхийллээ. Тэрбээр хуулийн төслийг цогцоор оруулж ирээгүй байна гэж шүүмжлэв. Тухайлбал, Хүний хөгжлийн сангаас иргэн бүрт 1.5 сая төгрөг олгохоор болсон. Энэ дагуу Оюутны сургалтын төлбөрт зориулж 500 мянган төгрөгийг Хүний хөгжлийн санд шилжүүлнэ гэж Засгийн газраас шийдвэрлэсэн. Түүн шиг  заавал даатгалд хамрагдах бололцоогүй, ажилгүй, ядуу иргэдийнхээ Эрүүл мэндийн даатгалын сан руу нь Хүний хөгжлийн сангаас 500 мянган төгрөг шилжүүлэх юм уу. Энэ нь ойлгогдохгүй байна. Хэрвээ ийм зарчмаар шийднэ гэж байгаа бол Хүний хөгжлийн сангаас шилжүүлсэн 500 мянган төгрөг нь эмчилгээ хийлгэх явцад дуусчихвал яах вэ. Таны даатгалын мөнгө 0 зааж байна, одоо эмнэлгээс гараад үхэж болно гэх юм уу. Эдгээр юм чинь харагдахгүй байна шүү дээ” гэлээ. Түүнчлэн УИХ-ын гишүүн Ө.Энхтүвшин дахин нэг агентлаг байгуулахын эсрэг байгаагаа мэдэгдлээ. Олон нийтийн зүгээс төрийн бүтэц данхайж байна гэж байнга шүүмжилдэг. Хэрвээ ийм нүсэр орон тоотой агентлаг байгуулна гэж үзвэл даргыг нь томилох болоход МАХН-аас нэг Ардчилсан намаас бас нэг дарга байх ёстой гээд хоёр даргын орон тоо гарч ирнэ. Даргыг дагаад туслах, өшөө цаашаа юу ч байдаг юм, 200 хүнээр тогтохгүй агентлагтай нүсэр бүтэц бий болно. Дараа нь УИХ-ын Төрийн байгуулалтын байнгын хорооны дарга аа, Төрийн албаны зөвлөлийн дарга аа, төрийн албан хаагчдын тоо чинь яагаад гэнэт өсчих вэ хариулт өгөөрэй гээд л өөрсдөө баталчихаад яриад шүүмжлээд сууж байх вий. Ийм байдлаар бид төрийн орон тоог нүсэр болгож болохгүй.  Энэ асуудлыг хоёр намын бүлэг дээр ярих ёстой гэв.  Гэвч санал хураах шатанд энэхүү хуулийн төслийг олонх гишүүн гар өргөн дэмжиж, анхны хэлэлцүүлэгт бэлтгүүлэхээр холбогдох байнгын хороонд шилжүүллээ.

Г.Дарь