Хонконгийн хөрөнгийн бирж дээр Монголын үндэсний компаниудаас “Энержи ресурс” анх удаа IPO хийж амжилттай хөрөнгө босгож буй талаар хэвлэлүүд шуугиж байна. Энэ сарын 13-наас арилжаагаа эхлүүлсэн тус компанийн 975 дугаартай хувьцааны ханш өнөөдрийг хүртэл тасралтгүй өссөөр байна. Өнөөдөр үдээс өмнө 8.99 хонконг долларт хүрч, үдээс хойшхи арилжаагаар мөн үнэ нэмэгдэж 9,30 болов.

Хувьцаа анх 7,02 хонконг долларын үнэтэйгээр зах зээлд гарч ирсэн юм. Арилжаа эхлэнгүүт ердөө 20 минутын дараахнаас хувьцааны ханш 7.17 болж, хаалт болоход 7,35 болж 4,7 хувийн өсөлттэй гэсэн дүнтэйгээр анхны өдрийн арилжааг хааж байв. 7.02 хонконг долларыг ам.доллар руу шилжүүлбэл 90 цент орчим бол харин төгрөгтэй тэнцэх үнэ 168 орчим юм. Өнөөдрийн байдлаар Төв банкнаас тогтоосон албан ханшаар хонконг доллар 168.22 төгрөгийн ханштай байна.

Б.БЯМБАА