Манай Үндэсний аюулгүй байдлын ажилтан маань гадаадад баривчлагдаад, байцаагдаж байна. Хамгийн жудаггүй явдал нь төрөөс өгсөн үүрэг даалгаврыг нэр төртэйгөөр биелүүлсэн албан хаагчдын нэрсийн жагсаалтыг харь орны хуулийн байгууллагад  өгчихсөн хүн байгаа нь сонин байна. Талийгаач Д.Энхбатыг С.Зоригийн аллагад сэжиглэж баривчилсан тусгай албан хаагчдын нэрсийг тушаал өгч явуулсан эзэн нь л гадныханд өгсөн байж таарна. Бид өнөөдөр ҮАБЗ-ийн ажлын албаны дарга Б.Хурцыг баахан шүүмжилж байгаа болохоос түүнийг барьж өгсөн жинхэнэ эзнийг нь, бүр тодруулбал жинхэнэ улсынхаа нууцыг задалсан хүний тухай ярихгүй байна.Харин түүнийг олох хэрэгтэй бус уу.  Тэгэж яривал Б.Хурц манай мангуунуудыг бодвол жинхэнэ чекист, жинхэнэ нууц албаны хүн юм. Тэр олон улс орны тагнуул, цагдаагийнханд мэдэгдэж баригдалгүй улсынхаа даалгаврыг биелүүлж, сэжигтнийг баривчлаад ирсэнд нь баяр хүргэсэн ч багадахаар. Б.Хурц дур зоргоороо гүйж очоод тэр хүнийг бариад ирсэн юм биш. Гүйцэтгэх албаны тушаал авсан хүн ажлаа хийсэн, бүр үүргээ 100 хувь гүйцэтгэсэн юм биш үү. Дөрвөн ч улсын хил гаалийг дамнуулан тагнуулын үйл ажиллагаа явуулж, хүн баривчилж авчирна гэдэг баргийн аавын хүүгийн зориглож хийдэг, захын нэг тагнуулчийн чаддаг ажил биш.  Хүн баривчилж авчирсан нь хүний эрхийг зөрчсөн хэрэг ч цаанаа Монголын тагнуулын байгууллагын, тэр тусмаа монгол чекистийн ур чадварыг дэлхийд гайхуулсан хэрэг биш гэж үү. Тэр тагнуул хийж яваад баригдчихсан юм биш. Аливаа нууц албаны ажилтнуудын хувьд тагнуулын үйл ажиллагаа явуулж байгаад баригдана гэдэг бол шившигтэй хэрэг болох биз ээ. Түүнийг өдгөө хэн золиосолж, бөмбөг шиг нааш цааш нь өшгичөөд эхлэв. Өмөөрөх эх орон, өмгөөлж хамгаалах ард түмэн гэж түүнд байх л ёстой. Ёсыг бодож ХЗДХ-ийн сайд Ц.Нямдорж, Шадар сайд М.Энхболд хоёр нэг албан бичиг илгээсэн бололтой юм. Агуу гүрэн агуу байдаг хойно, юу л гэж асуусан бүхэнд нь хариулав гэж. Бараг тэр бичгийг нь тоож харах ч үгүй биз.

Хүний эрхийн үндэсний комиссын дарга Н.Солонго хүртэл Б.Хурцын эрх хэрхэн зөрчигдөж байгаа талаар мэдээлэл өгөхөөс зайлсхийж байна.  Хэрэв Б.Хурцыг баривчилсан улсын хуульд манай улсын Эрүүгийн хуулийн 41.1-д заасны дагуу “Гэмт хэрэг үйлдсэн этгээд болон оргосон ялтан шинээр гэмт хэрэг үйлдэх боломжийг таслан зогсоох, түүнийг төрийн байгууллагад хүргэхийн тулд баривчлах, саатуулах үед  энэ хуулийн тусгай ангид заасан үйлдлийг хийж гэм хор учруулсан бол гэмт хэрэгт тооцохгүй” гэсэн хуулийн заалт байдаг бол Б.Хурцыг биш харин тухайн үед Б.Хурцад тушаал өгсөн дарга тагнуулчийг олж шалгах шаардлагатай болж байгаа юм. Тэгвэл манай улсад шургасан энэ зууны гайгүй сайн тагнуулчийг Англи улс илрүүлчих юм биш байгаа гэсэн бодол төрж байна.

Б.Хурцыг золионд гаргах нь хэнд ашигтай вэ. Ямар нэгэн ашиг сонирхлын зөрчил байгаа болохоор л түүнийг ингэж өөд уруугүй балбаж байгаа хэрэг. Б.Хурц эх орондоо ирвэл цөөнгүй хүмүүсийн суудалдаа үлдэх эсэх нь шийдэгдэнэ хэмээн жиг жуг гэлцэж эхэллээ. Улс төрийн хоёр намынхан бие биеэ Б.Хурцаар далимдуулан жадалж байна. МАХН-ынхан Б.Хурц бол Ц.Элбэгдоржийн хүн. Тиймээс Б.Хурцын хэргээр далимдуулан төрийн тэргүүний нэр хүнд, тэр тусмаа АН шавар шавхайтай хутгалдах юм байх. Ингэж хэлэх нэгэн байхад зөрүүлээд Б.Хурцад үүрэг өгч, хүн хулгайлуулсан хүн нь экс Ерөнхийлөгч Н.Энхбаяр гэж, тэртэй тэргүй намнуулж дуусаад байгаа түүнийг улс төрийн тавцангаас нь бүрмөсөн зайлуулах сонирхолтой нөгөө нэг хэсэг бий гэх. Тэд МАХН-ынхан албан тушаал, ашиг хонжооны төлөө хэнийг ч золиослоход бэлэн гэдгийг олон нийтэд мэдрүүлэхийг хичээж буй юм гэнэ.  Юутай ч Б.Хурц гэдэг тагнуулчаар дамжуулан улс төрийн тоглолт хийгсэд улс орны нэр нүүрийг дэлхий дахинаа унагаж, төрийн нэр хүндийг долоон уул давуулан шидэж орхив бололтой. Бид жижиг сэтгэдэг улс юм. Бид ийнхүү тоосноосоо бусгаж, толгойгоороо тоглож байх зуур өөр ашиг сонирхлын бүлгийнхэн ч хөдөлгөөнд орсон сурагтай. Б.Хурц тагнуулчаар барьцаалж “Рио Тинто”-гийнхон хөрөнгө оруулалтын гэрээгээ эргэж нэг хараач гэх ухааны юм ч ярьж, шантаажилж байна гэсэн байх шүү. Худлаа л байгаасай.

Б.ОЮУ.

Зохиогчийн эрх: “Монголын мэдээ” сонин.