Дэд хорооны хуралдаанаар хоёр талын худалдаа, хөрөнгө оруулалтын өнөөгийн байдал, Монгол Улсын аж үйлдвэр, уул уурхай, эрдэс баялаг, аялал жуулчлалын салбарын хөгжил, Европын Холбоотой хамтран ажиллах боломж, чиглэлийн талаар мэдээлэл, санал солилцлоо. Монгол Улсын эдийн засаг, экспортод чухал үүрэг гүйцэтгэж буй уул уурхайн салбарын хөгжил, эрх зүйн орчныг Европын Комиссийн төлөөлөгчид ихээхэн сонирхож, гадаадын хөрөнгө оруулалтыг татахад эрх зүйн тогтвортой орчин нэн чухал болохыг онцлон тэмдэглэсэн байна.
Мөн Монгол Улс, Европын Холбооны хооронд байгуулах Түншлэл, хамтын ажиллагааны хэлэлцээрийн бүрэлдэхүүн хэсэг болох худалдаа, хөрөнгө оруулалтын хамтын ажиллагааны асуудлаар явагдаж буй хэлэлцээний явц, үр дүн, цаашдын алхмын талаар хоёр тал байр сууриа илэрхийллээ. Түншлэл, хамтын ажиллагааны хэлэлцээрт тусгах Түүхий эдийн худалдааны асуудлаарх заалтын талаар хоёр тал урьдчилсан тохиролцоонд хүрсэн нь энэхүү хуралдааны томоохон амжилт боллоо.
Түүнчлэн Европын Комиссийн төлөөлөгчид түүхий эдийн худалдааны асуудлаар Европын Холбооны хэрэгжүүлж буй бодлогын талаар мэдээлж, түүхий эдийн экспортод учирч буй хориг саадыг багасгах байр суурьтай байгаагаа илэрхийлсэн юм.
Монгол Улсыг зах зээлийн бус эдийн засагтай орнуудын жагсаалтаас хасах чиглэлээр Европын Комиссийн хэрэгжүүлж буй арга хэмжээ, явцын талаар Европын Комиссийн төлөөлөгчид мөн мэдээлэл хийж, Монгол Улсад зах зээлийн эдийн засагтай орны статусыг аль болох ойрын хугацаанд олгох талаар хүчин чармайлт гарган ажиллахаа илэрхийллээ.
Худалдаа, хөрөнгө оруулалт, аялал жуулчлалын Дэд хорооны 12 дугаар хуралдаанаар хэлэлцсэн асуудал, үр дүнгийн талаар мөн энэ өдөр болох Монгол- Европын Холбооны Хамтарсан хорооны 13 дугаар хуралдаанд танилцуулж, эл Хуралдаанаас гарах баримт бичиг болох Хамтарсан мэдэгдэлд тусгах юм.
